استانالىق سۋرەتشى مەملەكەتتىك قىزمەتكەرلەردى «كاپىر» دەپ اتاعانى ءۇشىن قاماۋعا الىندى. ۇلتتىق قاۋىپسىزدىك كوميتەتى سۋرەتشى داۋرەن ماكيننىڭ ۇستىنەن تەرگەۋ جۇرگىزىپ جاتىر. بۇل تۋرالى ازاتتىق راديوسى جاريالادى، دەپ حابارلايدى "ادىرنا" ۇلتتىق پورتالى.
د. ماكيننىڭ قامالعانىنا بەس كۇن بولعان. اكەسىنىڭ ايتۋىنشا، داۋرەن ماكينگە جەلتوقسان ايىندا «ارىستان» دەگەن بۇركەنشىك اتى بار اداممەن كەزدەسىپ، مەملەكەتتىك قىزمەتكەرلەردى «كاپىر» دەپ اتاپ، بيلىككە، ونىڭ تۇتاستىعىنا قارسىلىققا شاقىرعان» دەگەن ايىپ تاعىلعان.
"ول ساياساتپەن ءىسى جوق، جاي سۋرەتشى. ناماز وقيتىنى راس، ول قىلمىس پا؟" – دەيدى اسقاربەك ماكين.
ونىڭ ءسوزىن داۋرەن ماكيننىڭ ادۆوكاتى جاسۇلان كومەكوۆ راستايدى. ادۆوكاتتىڭ ايتۋىنشا، ماكينگە سۋرەت سالۋدى ۇيرەنەمىز دەگەن سىلتاۋمەن ەكى ادام كەلىپ، ورتاداعى اڭگىمەنى ديكتوفونعا جازىپ العان.
– باسقا ەشقانداي دالەل جوق. بارلىق ايىپتاۋ الدەبىر ديكتوفونداعى جازباعا قۇرىلعان. ونى دا قولىمىزعا بەرگەن جوق. بىراق سول جازباعا ساراپتاما جاساپ، ماكيننىڭ سوزىندە تەرروريستىك سارىن بار ەكەنى، الگى ەكى اداممەن اڭگىمەدە بيلىكتى اۋىستىرىپ، ونى شاريعات جۇيەسىنە نەگىزدەپ قايتا قۇرۋ كەرەك دەگەن وي ايتىلعان دەپ قورىتىندى جاساعان، – دەيدى ول.
كەي دەرەككوزدەر ماكين مەسسەندجەردە "الدەبىر حابارلامانى جىبەرگەنى ءۇشىن" ءىستى بولدى دەگەن بولجام ايتتى. ۇلتتىق قاۋىپسىزدىك كوميتەتى سۋرەتشى ماكيننىڭ تۇتقىندالۋىنا قاتىستى جاۋاپ بەرۋدەن باس تارتىپ، رەسمي ساۋال جولداۋدى سۇرادى.
"ادىرنا" ۇلتتىق پورتالى
