مەملەكەتتىك كەڭەسشى ەرلان قارين شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ وتىرىسىن وتكىزدى، دەپ حابارلايدى “ادىرنا” ۇلتتىق پورتالى.
كوميسسيانىڭ شەشىمىمەن 184 وتانداسىمىزعا «بولاشاق» ستيپەندياسى تاعايىندالدى. ولار ماگيستراتۋرا جانە دوكتورانتۋرا باعىتتارى بويىنشا الەمنىڭ ۇزدىك ۋنيۆەرسيتەتتەرىندە ءبىلىم الادى. سونىمەن قاتار وتىرىستا وتاندىق عالىمداردىڭ جەتەكشى شەتەلدىك عىلىمي ورتالىقتاردا عىلىمي تاعىلىمدامادان ءوتۋ ماسەلەسى قارالدى.
مەملەكەتتىك كەڭەسشى پرەزيدەنتتىڭ اتالعان باستاماسى قازاقستان عىلىمىنىڭ دامۋىن ىنتالاندىرۋعا باعىتتالعانىن اتاپ ءوتتى. ەرلان قارين عىلىمي تاعىلىمداماعا ارنالعان گرانتتاردى ءبولۋ كەزىندە وتاندىق عىلىمنىڭ باسىم باعىتتارى بويىنشا تەپە-تەڭدىكتى مىندەتتى تۇردە ساقتاۋ قاجەت ەكەنىنە نازار اۋداردى. بۇل الەۋمەتتىك-گۋمانيتارلىق، سونداي-اق ينجەنەرلىك-تەحنيكالىق ماماندىقتارعا دا قاتىستى. مەملەكەتتىك كەڭەسشى وتىرىس قورىتىندىسى بويىنشا «بولاشاق» حالىقارالىق ستيپەندياسىنا جانە عىلىمي تاعىلىمدامالار باعدارلاماسىنا كونكۋرستىق نەگىزدە ىرىكتەۋ پروتسەسىن ودان ءارى جۇزەگە اسىرۋعا ءارى جەتىلدىرۋگە قاتىستى بىرقاتار ناقتى تاپسىرما بەردى.
“بۇگىن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسىن وتكىزدىك. جالپى بيىل 184 وتانداسىمىز «بولاشاق» حالىقارالىق ستيپەندياسىنا يە بولدى.
كوميسسيا وتىرىسىندا وتاندىق عالىمداردىڭ الەمنىڭ جەتەكشى عىلىمي ورتالىقتارىندا تاعىلىمدامادان ءوتۋ ماسەلەسى قارالدى. بۇل رەتتە عىلىمي تاعىلىمداما بويىنشا گرانتتاردى ءبولۋ كەزىندە وتاندىق عىلىمنىڭ باسىم باعىتتارى بويىنشا تەپە-تەڭدىكتى مىندەتتى تۇردە ساقتاۋ كەرەك. بۇل الەۋمەتتىك-گۋمانيتارلىق باعىتتاعى، سونداي-اق ينجەنەرلىك-تەحنيكالىق باعىتتاعى ماماندىقتارعا دا قاتىستى. الەمنىڭ ۇزدىك جوعارى وقۋ ورىندارىندا ءبىلىم الىپ، جەتەكشى عىلىمي، وندىرىستىك ورتالىقتاردا ءتيىستى تاعىلىمدامادان وتەتىن قازاقستاندىقتار كەلەشەكتە ەلىمىزدىڭ دامۋى مەن وركەندەۋىنە قىزمەت ەتەدى دەپ سەنەمىن” دەپ جازدى ەرلان قارين جەلىدە.
