بۇگىن، 24 ماۋسىم ءماجىلىس كۋلۋارىندا جۋرناليستەردىڭ سۇراعىنا جاۋاپ بەرىپ تۇرىپ، ءجونسىز ايتىلعان ءسوزى ءۇشىن اۋىل شارۋاشىلىعى ءمينيسترى ايداربەك ساپاروۆ سىن استىندا قالدى، دەپ حابارلايدى “ادىرنا” ۇلتتىق پورتالى قازتاگ-قا سىلتەپ.
جۋرناليستەر مينيستردەن شەگىرتكەنىڭ بيىل ەگىن دالاسىنا كەلتىرگەن شىعىنى جونىندە سۇراعان. كيىكتەن كەلگەن شىعىندى ەسەپتەپ بىتپەي جاتقان ۋاقىتتا شەگىرتكەدەن كەلەتىن شىعىندى قالاي ەسەپتەيسىزدەر؟ ساۋال وسىلاي قويىلدى.
“كيىكتەر مەن شەگىرتكەلەردى سالىستىرماي-اق قويايىقشى. ەكەۋى ەكى باسقا. شەگىرتكەدەن ءالى شىعىن كەلگەن جوق. ەگەر شىعىن كەلسە... اللو... رۇقسات پا؟ – دەدى مينيستر.
وسى كەزدە جۋرناليستەردىڭ ءبىرى «نەلىكتەن ءسىز ءوزىڭىزدى بۇلاي ۇستايسىز؟» دەپ ەسكەرتۋ جاسادى.
“جوق، جوق، مەن ءوز ادامدارىما ايتىپ جاتىرمىن عوي. سىزگە ەمەس”، - دەپ اقتالدى مينيستر.
جۋرناليست «ءوزىڭىزدىڭ قىزمەتكەرلەرىڭىزگە ايتىلسا دا، بۇل دۇرىس پا؟» دەپ ەسكەرتۋ جاساعان. «كەشىرىڭىز» دەدى مينيستر.
“شەگىرتكە بىلتىر 1,5 ملن گا جەرگە تارالسا، بىلتىر پرەپاراتتى ۋاقىتىندا الماعاننىڭ سالدارىنان بيىل 2,5 ملن گا اۋماققا كوبەيىپ كەتتى. كۇزدە زەرتتەۋ جۇمىستارىن جۇرگىزگەن كەزدە 2,5 ملن گە جەرگە پرەپارات كەرەكتىگىن تۇسىندىك. بىراق بەكىتىلگەن بيۋدجەتتە 4,2 ملرد تەڭگە عانا اقشا بولدى. وسى ماسەلەدە پرەمەر-مينيستر ءبىزدى قولداپ، تاعى 3,9 ملرد تەڭگە بەردى. سوندىقتان، قاراجات پەن پرەپارات جەتكىلىكتى”، – دەدى ساپاروۆ.
سونداي-اق، ول قازىر شەگىرتكەمەن كۇرەسكە 427 تەحنيكا، 36 ۇشاق، 36 دەلتاپلان جۇمىلدىرىلعانىن ايتتى.
