اۋىل شارۋاشىلىعى مينيسترلىگى قازاقستاندا سيىر ەتىنىڭ باعاسىنىڭ قىمباتتاۋىنا قاتىستى ەتتىڭ قۇنى قالاي قالىپتاساتىنىن جانە نەگىزسىز قىمباتتاۋدىڭ الدىن الۋ ءۇشىن قانداي شارالار قابىلدانىپ جاتقانىن ءتۇسىندىردى، دەپ حابارلايدى "ادىرنا" ۇلتتىق پورتالى.
مينيسترلىك مالىمەتىنشە، ءبىر كيلوگرامم سيىر ەتىن ءوندىرۋدىڭ وزىندىك قۇنى ورتا ەسەپپەن 2 800–3 100 تەڭگە ارالىعىندا. وعان 15% كوتەرمە ۇستەمەاقى قوسىلعاندا، باعا 3 400–3 500 تەڭگە شاماسىن قۇرايدى.
دەگەنمەن دۇكەن سورەلەرىندەگى باعا بۇدان جوعارى بولۋى مۇمكىن، ويتكەنى بولشەك ساۋداداعى قۇن تەك وندىرىستىك شىعىن مەن ۇستەمەاقىعا عانا ەمەس، سونىمەن قاتار ساتىلىپ جاتقان ەتتىڭ قاي بولىگىنە بايلانىستى وزگەرەدى.
ءىرى قارا مالدىڭ ءبىر تۇتاس ەتى سويىلعاندا، ءتىرى سالماعىنىڭ تەك 50–60%-ى عانا تاعامعا جارامدى بولىپ شىعادى. ونىڭ ىشىندە پرەميۋم ساناتتاعى بولىكتەر – فيلەي، ريباي نەمەسە قازى-قارتانىڭ ەتتەرى – جالپى كولەمنىڭ 15–20%-ىنان اسپايدى جانە ءداستۇرلى تۇردە قىمباتقا ساتىلادى.
ورتاشا سەگمەنت شامامەن 40–45%-دى قۇرايدى، ال تومەنگى بولىگىنە تورتتەن ءبىرى تيەسىلى. ال تاعى 15–20%-ى سۇيەك، ماي جانە ەت قالدىقتارىنان تۇرادى، ولار ەت رەتىندە ساتىلمايدى. سوندىقتان دۇكەندەردەگى باعا ەتتىڭ ساناتى مەن ساپاسىنا قاراي ايتارلىقتاي وزگەرەدى: مايسىز بولىكتەر ارزانىراق بولسا، جۇمساق ەت پرەميۋم ساناتىنا جاتادى.
