ماجىلىستەگى ۇكىمەت ساعاتىندا ەنەرگەتيكا ءمينيسترى بولات اقشولاقوۆ 2025 جىلعا قاراي قازاقستاندا وتاندىق گاز تاپشىلىعى بولۋى مۇمكىن ەكەنىن ايتتى، دەپ حابارلايدى “ادىرنا” ۇلتتىق پورتالى.
«گاز قورى بويىنشا قازاقستان الەمدە 22-ورىندا، ال تمد ەلدەرى اراسىندا رەسەي مەن تۇرىكمەنستاننان كەيىن ءۇشىنشى ورىندا. تابيعي گازدى كەڭىنەن پايدالانۋ مۇمكىندىگىن ەسكەرە وتىرىپ، الەمدىك ەكونوميكادا ونىڭ ماڭىزى زور. ەل ىشىندە گاز تۇتىنۋ تۇراقتى تۇردە ءوسىپ كەلەدى. 2017 جىلدان باستاپ 2021 جىلدى قوسا العانداعى كەزەڭدە تۇتىنۋ 13,8-دەن 18,6 ملرد تەكشە مەترگە دەيىن، ياعني، 4,8 ملرد تەكشە مەتر دەڭگەيىندە ءوستى. گاز تۇتىنۋ ءوسىمى شامامەن 35 پايىزدى نەمەسە جىل سايىن ورتا ەسەپپەن 7 پايىزدى قۇرادى»، – دەدى بولات اقشولاقوۆ.
ءمينيستردىڭ ايتۋىنشا، گاز سالاسىن دامىتۋدىڭ نەگىزگى تەجەۋىش فاكتورى باعانى ۇستاپ تۇرۋ ساياساتىنا بايلانىستى.
«وسىعان بايلانىستى 2025 جىلعا قاراي وتاندىق گازدىڭ تاپشىلىعى جانە يمپورتتىق رەسۋرستارعا تاۋەلدىلىك بولۋى مۇمكىن»، – دەدى ول.
“ادىرنا” ۇلتتىق پورتالى.
