Búgin, 24 maýsym májilis kýlýarynda jýrnalısterdiń suraǵyna jaýap berip turyp, jónsiz aıtylǵan sózi úshin Aýyl sharýashylyǵy mınıstri Aıdarbek Saparov syn astynda qaldy, dep habarlaıdy “Adyrna” ulttyq portaly QazTAG-qa siltep.
Jýrnalıster mınıstrden shegirtkeniń bıyl egin dalasyna keltirgen shyǵyny jóninde suraǵan. Kıikten kelgen shyǵyndy eseptep bitpeı jatqan ýaqytta shegirtkeden keletin shyǵyndy qalaı esepteısizder? Saýal osylaı qoıyldy.
“Kıikter men shegirtkelerdi salystyrmaı-aq qoıaıyqshy. Ekeýi eki basqa. Shegirtkeden áli shyǵyn kelgen joq. Eger shyǵyn kelse... Allo... Ruqsat pa? – dedi mınıstr.
Osy kezde jýrnalısterdiń biri «nelikten siz ózińizdi bulaı ustaısyz?» dep eskertý jasady.
“Joq, joq, men óz adamdaryma aıtyp jatyrmyn ǵoı. Sizge emes”, - dep aqtaldy mınıstr.
Jýrnalıst «ózińizdiń qyzmetkerlerińizge aıtylsa da, bul durys pa?» dep eskertý jasaǵan. «Keshirińiz» dedi mınıstr.
“Shegirtke byltyr 1,5 mln ga jerge taralsa, byltyr preparatty ýaqytynda almaǵannyń saldarynan bıyl 2,5 mln ga aýmaqqa kóbeıip ketti. Kúzde zertteý jumystaryn júrgizgen kezde 2,5 mln ge jerge preparat kerektigin túsindik. Biraq bekitilgen bıýdjette 4,2 mlrd teńge ǵana aqsha boldy. Osy máselede premer-mınıstr bizdi qoldap, taǵy 3,9 mlrd teńge berdi. Sondyqtan, qarajat pen preparat jetkilikti”, – dedi Saparov.
Sondaı-aq, ol qazir shegirtkemen kúreske 427 tehnıka, 36 ushaq, 36 deltaplan jumyldyrylǵanyn aıtty.
