بۇگىن، 12 ماۋسىم كۇنى وتكەن ءماجىلىس وتىرىسىندا دەپۋتات نارتاي سارسەنعاليەۆ ەلدە ورىن العان زاڭعا قايشى سوڭعى جايتتاردىڭ قاۋىپتىلىگىن اتاپ، ىشكى ىستەر مينيسترىنە ساۋال جولدادى، دەپ حابارلايدى “ادىرنا” ۇلتتىق پورتالى.
دەپۋتات اتىراۋ قالاسىندا بولعان كىسى ءولىمى مەن الماتى وبلىسىنداعى كوككە وق وتقانداردىڭ باسسىزدىعىن اتادى. مينيسترلىكتەن اتالمىش جايتتاردى قاتاڭ باقىلاۋعا الۋىن سۇرادى:
“ۇيلەنۋ تويىنىڭ قۇرمەتىنە سەرۋەنگە شىققاندار اۆتومات پەن تاپانشادان وڭدى-سولدى وق جاۋدىرىپ، قارۋدى كەزەكپەن الىپ وق اتىپ قىزىق قۋعان. قىمبات كولىك، كوپ اقشا زاڭدى بەلدەن باسۋعا مۇمكىندىك بەرەتىن باسسىزدىققا اكەلمەۋى كەرەك، بۇل بۇلجىماس قاعيدا ەمەس پە؟ الايدا اۋىلدىڭ ورتاسىندا جاۋعان وقتاپ قورقىپ قاشقان قاراپايىم حالىقتى دا، ءتارتىپ ساقشىلارىن دا كوزگە ىلمەگەن ويسىز تويشىلدار قۇددى ءبىر 90-شى جىلداردا جۇرگەندەي قارۋدى قالاعانىنشا قولدانعان. ونىسىن ابىروي كورىپ ۆيدەو-فوتوسىن الەۋمەتتىك جەلىگە جۇكتەگەن. بۇل دەگەنىڭىز تاۋەلسىز ەلدىڭ زاڭىن ەلەمەۋدىڭ، جازاسىز قالاتىندارىنا سەنىمدى بولۋدىڭ كوپە-كورنەۋ كورىنىس ەمەس پە؟” دەدى نارتاي ارالبايۇلى.
سونداي-اق ول، جاقىن كۇندەرى مەكتەپ تۇلەكتەرىنىڭ ءبىتىرۋ كەشتەرى بولاتىنىن، اتالمىش كەشتەردە تارتىپسىزدىك ورىن الماۋىن، ادام شىعىنىنىڭ الدىن الۋ قاجەت ەكەنىن ەسكە سالدى:
“از كۇندە ورتا مەكتەپ تۇلەكتەرى، ءتۇرلى وقۋ ورىندارىنىڭ بىتىرۋشىلەرى اتتەستات، ديپلوم الۋ كەشتەرىن جاپپاي اتاپ وتەدى. سول كەزدە دە وتشاشۋ جاساپ، اۆتوكولىكپەن جارىسىپ جاستارىمىز اپاتقا ۇشىراپ جازىم بولماۋى ءۇشىن بارلىق جاعدايدى جاساۋ كەرەك. تۇلەكتەرمەن، اتا-انالارمەن ءتۇسىندىرۋ جۇمىستارىن جۇرگىزگەن ءجون” دەپ قوستى ول.
ىشكى ىستەر ءمينيسترى ەرجان ساپاربەكۇلىنا قوعامدىق ءتارتىپتى ساقتاۋ شارالارىن كۇشەيتىپ، تۇلەكتەردىڭ كەشتەرىندە زاڭسىزدىق ورىن الماۋى ءۇشىن رەيدتەر جۇرگىزۋ قاجەتتىگىن اتادى ول. ونىمەن قوسا:
“پروكۋراتۋرا، سوت-تەرگەۋ ورگاندارى الماتى وبلىسى ەڭبەكشى قازاق اۋدانىنىڭ تۇرگەن اۋىلىندا بولعان وقيعانى سارالاپ، وعان قاتىسى بار ازاماتتارعا زاڭعا ساي قاتاڭ جازا كەسۋى كەرەك. ىشكى ىستەر مينيسترلىگى قاراپايىم ازاماتتاردىڭ قولىنداعى قارۋ-جاراققا ينۆەنتاريزاتسيا جۇرگىزىپ، ولاردىڭ زاڭعا سايكەس كەلمەيتىندەرىن تاركىلەۋ قاجەت. جانە وسى سالانى رەتتەيتىن نورماتيۆتىك-قۇقىقتىق اكتىلەردى قاتاڭداتۋ كەرەك” دەپ اتاپ ءوتتى نارتاي سارسەنعاليەۆ.
