ماجىلىستە جانۋارلارعا جاۋاپكەرشىلىكپەن قاراۋ ماسەلەلەرىنە قاتىستى زاڭ جوباسىنا سەنات ەنگىزگەن تۇزەتۋلەر قارالدى. دەپۋتات ەربولات ساتىبالدى جەكەلەگەن باپتار تۋرالى تۇسىنىكتەمە بەردى، دەپ حابارلايدى «ادىرنا» ءتىلشىسى.
ول سەنات ۇسىنعان وزگەرىستەردىڭ نەگىزىنەن ناقتىلاۋشى سيپاتتا ەكەنىن اتاپ ءوتتى. ايتۋىنشا، قۇجاتتاعى نەگىزگى زاڭنامالىق تۇجىرىمداما وزگەرىسسىز ساقتالعان.
«يەسىز جانۋارلاردىڭ سانىن رەتتەۋ ماسەلەلەرى، ونىڭ ىشىندە ءتارتىبى مەن مەرزىمدەرى جەرگىلىكتى وكىلدى ورگانداردىڭ قۇزىرەتىنە بەرىلىپ، «يەسىز جانۋارلار» ۇعىمىن ناقتىلاندى. سونداي-اق جانۋارلاردى جانسىزداندىرۋ تۋرالى شەشىمدى ۆەتەريناريالىق قورىتىندى نەگىزىندە قابىلداۋ نورماسى تولىقتىرىلدى جانە وزگە دە تۇزەتۋلەر ەنگىزىلدى»،-دەدى ءماجىلىس دەپۋتاتى.
ەربولات ساتىبالدى مەملەكەت باسشىسى قاسىم-جومارت توقاەۆتىڭ جانۋارلارعا جاۋاپكەرشىلىكپەن قاراۋ مادەنيەتىن قالىپتاستىرۋ جانە ءۇي جانۋارلارىنا قاتىگەزدىككە جول بەرمەۋ جونىندەگى تاپسىرمالارىن دا ەسكە سالدى. ونىڭ ايتۋىنشا، پرەزيدەنت تاپسىرماسىن ورىنداۋ اياسىندا جانۋارلاردى ەسەپكە الۋ جۇيەسىن ناقتىلاۋ قاجەت. وسى رەتتە جانۋارلاردى چيپتەۋ مەن تىركەۋ يەلىك قۇقىعىن انىقتاۋدىڭ نەگىزگى تەتىگى بولۋى ءتيىس ەكەنى ايتىلدى.
«قاراپايىم تىلمەن ايتقاندا، ەگەر جانۋار ەسەپكە الىنباسا ، ونىڭ يەسىن انىقتاۋ مۇمكىن ەمەس، ال يەسى انىقتالماسا، جاۋاپكەرشىلىك تە بولمايدى»،- دەدى ول.
