قازاقستاندا كاسساتسيالىق سوتتار قۇرىلادى. بۇل تۋرالى ءماجىلىس دەپۋتاتى ابزال قۇسپان ايتتى، دەپ حابارلايدى “ادىرنا” ۇلتتىق پورتالى.
بۇگىن، 14 ماۋسىم پارلامەنت پالاتالارىنىڭ بىرلەسكەن وتىرىسىندا دەپۋتاتتار «قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» قر كونستيتۋتسيالىق زاڭىنىڭ جوباسىن ءبىرىنشى وقىلىمدا ماقۇلدادى.
«زاڭ جوباسى ءبىرىنشى وقىلىمنان شىقتى، ەكىنشى وقىلىمعا دەيىن تولىقتىرۋلار مەن وزگەرتۋلەر بولۋى مۇمكىن. ەڭ باستى جاڭالىق – كاسساتسيالىق سوتتاردىڭ قۇرىلۋى. بۇل ماسەلەنى زاڭگەرلەر قاۋىمى بۇرىننان كوتەرىپ كەلەدى. وسى كەزگە دەيىنگى ءتارتىپ قالاي ەدى؟ جوعارعى سوت ءبىر سۋديا قۇرامىمەن ماسەلەنى كاسساتسيالىق القاعا بەرە مە، بەرمەي مە، ءوزى شەشەتىن. سونى جويدىق. پرەزيدەنت تە بۇل جايىندا ايتقان بولاتىن. مەملەكەت باسشىسىنىڭ تاپسىرماسىنا سايكەس، كاسساتسيالىق سوتتار ءوز الدىنا بولەك قۇرىلىپ جاتىر»، - دەدى ول.
سونىمەن قاتار ماجىلىسمەن دەپۋتاتتاردىڭ قازىرگى جاعدايىنا توقتالدى.
«جالپى، سۋديالاردىڭ جاعدايى ءسىز بەن ءبىز ويلاعانداي ءماز ەمەس. ولاردىڭ جالاقىسى ءبىر كەزدەرى جاقسى كوتەرىلىپ ەدى. كەيىن ينفلياتسيا سالدارىنان ازايدى. سونىمەن قاتار ولاردىڭ ماتەريالدىق-تەحنيكالىق، كولىكپەن، ۇيمەن قامتاماسىز ەتىلۋ ماسەلەسى شەشىلمەي جاتىر. جالاقىلارى ەڭ العاش سۋديا بولعان كەزدە 300 مىڭ تەڭگە نە وعان دا جەتپەيدى دەپ ويلايمىن. الىس اۋداندارعا ەشكىمنىڭ بارعىسى كەلمەيدى. جاۋاپكەرشىلىك تە جوعارى»، - دەدى ابزال قۇسپان.
