پەتروپاۆلدا بەس قاباتتى ءۇيدىڭ تەرەزەسىنەن 4 جاسار بالا قۇلاپ كەتكەن. ءبۇلدىرشىننىڭ ءومىرى ءۇشىن دارىگەرلەر كۇرەسىپ جاتىر. بۇل تۋرالى سولتۇستىك قازاقستان وبلىسى پوليتسيا دەپارتامەنتى ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
وقىس وقيعا 7 ماۋسىم كۇنى بولدى.
«پەتروپاۆل قالاسى پوليتسيا باسقارماسىنىڭ «102» جەدەل نومىرىنە يبراەۆ كوشەسىندەگى بەس قاباتتى ءۇيدىڭ تەرەزەسىنەن بالانىڭ قۇلاپ كەتكەندىگى تۋرالى اقپارات ءتۇستى. قازىرگى ۋاقىتتا ءبۇلدىرشىن وبلىس ورتالىعىنداعى ەمدەۋ مەكەمەلەرىنىڭ بىرىندە. تەكسەرۋ جۇرگىزىلىپ جاتىر»، - دەپ حابارلادى سولتۇستىك قازاقستان وبلىسى پوليتسيا دەپارتامەنتى ءباسپاسوز قىزمەتىنەن.
وبلىستىق كوپبەيىندى بالالار اۋرۋحاناسىنىڭ ديرەكتورى نۇرلان ايمانوۆتىڭ ايتۋىنشا، بالا جانساقتاۋ بولىمىندە جاتىر، جاعدايى وتە اۋىر. قانداي جاراقاتتار العانى دارىگەرلىك قۇپيا. ماماندار ءبۇلدىرشىندى امان الىپ قالۋ ءۇشىن قولدان كەلگەننىڭ ءبارىن جاساپ جاتىر.
