پەتروپاۆلدا جاقسى وقيتىن وقۋشىلارعا شاكىرتاقى تولەنەدى، دەپ حابارلايدى «ادىرنا» ۇلتتىق پورتالى.
حابار 24 مالىمەتىنشە، وبلىس ورتالىعىنداعى مەكتەپتەردىڭ بىرىندە جۇزدەن استام بالاعا اي سايىن قارجىلاي قولداۋ كورسەتىلەدى. وسىنىڭ ارقاسىندا وزات وقۋشى كوبەيگەن.
ءتىپتى وزگە ءبىلىم وشاعىنان اۋىسىپ كەلگىسى كەلەتىندەر دە بار. ماكسيم سەرەنكو ءتورتىنشى سىنىپتا وقيدى. وقۋدا وزات، ونەردە ورەلى، ال سپورتتا الدا. ەڭ سۇيىكتى ءپانى – دەنە شىنىقتىرۋ. ساباعىن كىلەڭ بەسكە وقيتىندىقتان اي سايىن شاكىرتاقى الادى. ونى قاجەتىنە جۇمسايدى.
ماكسيم سەرەنكو، وقۋشى:
- ءتىل ۇيرەنۋ ءۇشىن ارنايى ستۋدياعا بارىپ، كۋرسقا قاتىسىپ ءجۇرمىن. سەبەبى ول بولاشاقتا وزىمە كەرەك بولادى عوي. وقۋدىڭ اقىسىن شاكىرتاقىمنان تولەيمىن.
اتالعان ءبىلىم ۇياسىندا مىڭعا جۋىق وقۋشى ءبىلىم الادى. ءار توعىزىنشى بالا - وقۋ وزاتى. تولەنەتىن شاكىرتاقى سوماسى بالالاردىڭ جاس ەرەكشەلىگىنە بايلانىستى. مىسالى ەكىنشى سىنىپ وقۋشىلارىنا 3 مىڭ تەڭگە، ال جوعارى سىنىپتاعىلار 20 مىڭ تەڭگەگە دەيىن الادى.
پولينا ۆاسيلەۆا، وقۋشى:
- قازىر قاجەتتى زاتتى اتا-انامنان سۇراماي، ءوزىم ساتىپ الۋعا تىرىسامىن. ءسىڭىلىم دە وسى مەكتەپتە وزات وقۋشى. ەكەۋىمىز شاكىرتاقىمىزدى جيناپ، 180 مىڭ تەڭگەگە كۇشىك الدىق. بۇل ءبىزدىڭ كوپتەن بەرگى ارمانىمىز ەدى.
مۇنداي باستامانىڭ ارقاسىندا بالالار ساباققا دەن قويىپ، ۇنەمى جاقسى كورسەتكىشتەرگە ۇمتىلادى دەيدى مەكتەپ ديرەكتورى. بىلتىر 49 وقۋشى حالىقارالىق، تاعى 56-سى رەسپۋبليكالىق وليمپيادالاردا توپ جارعان.
اققۋ وماروۆا، مەكتەپ ديرەكتورى:
- شاكىرتاقى الۋ ءۇشىن باسقا مەكتەپتەن بىزگە اۋىسقىسى كەلەتىندەر كوبەيدى. سونداي-اق بالالاردىڭ وقۋعا دەگەن قىزىعۋشىلىعى ارتتى. ياعني ۋاقىت وتكەن سايىن مەكتەبىمىزدە ءبىلىم ساپاسى جاقسارىپ كەلەدى. ىنتالاندىرۋ شاكىرتاقىسىن وسى مەكتەپتىڭ تۇلەگى، قالاداعى مەتسەناتتاردىڭ ءبىرى ءوز قالتاسىنان تولەيدى. ول ايىنا شامامەن بۇل ماقساتقا ءبىر ميلليون تەڭگە اۋدارادى.
«ادىرنا» ۇلتتىق پورتالى
