ءماجىلىستىڭ جالپى وتىرىسىندا «AMANAT» پارتياسى فراكتسياسىنىڭ جەتەكشىسى ەلنۇر بەيسەنباەۆ ۇكىمەتتىڭ جانە جوعارى اۋديتورلىق پالاتانىڭ 2023 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبىنە قاتىستى پىكىر ءبىلدىردى.
دەپۋتاتتىڭ ايتۋىنشا، ەكونوميكانىڭ جاي-كۇيىن بەينەلەيتىن بىرقاتار كورسەتكىشتەر ءالى دە كوڭىل كونشىتپەيدى.
«ەلىمىزدە جۇمىس ىستەيتىن 10 ميلليون ادامنىڭ 9 ميلليونىندا نەسيە بار بولسا، ال بورىشكەرلەر رەەسترىندە قارىزى بار جەكە تۇلعالاردىڭ سانى – 3,5 ميلليون ادام. سونداي-اق، تۇتىنۋشىلىق نەسيە كولەمى 2022 جىلى 13,2 ترلن تەڭگە بولسا، 2023 جىلدىڭ قورىتىندىسى بويىنشا 18,2 ترلن تەڭگەنى قۇراپ وتىر. ياعني، 1 جىلدا نەسيە الۋشىلاردىڭ سوماسى – 5 تريلليونعا ءوستى»، – دەدى ول.
ەلنۇر بەيسەنباەۆتىڭ ايتۋىنشا، بۇل تسيفرلار – حالىقتىڭ قارىزعا ءومىر ءسۇرىپ جاتقانىنىڭ ناقتى بەلگىسى. 18 ترلن تەڭگە كولەمىندەگى تۇتىنۋشىلىق نەسيە – ەلىمىزدىڭ جىلدىق بيۋدجەتىنىڭ 78 پايىزىنا پارا-پار. بۇل نەسيەلەردىڭ ۋاقىتىلى تولەنبەۋى ەلىمىزدىڭ قارجى جۇيەسىن ءبىر كۇندە تەحنيكالىق دەفولتقا الىپ كەلۋى مۇمكىن.
«2023 جىلعى بيۋدجەت قاراجاتىنىڭ 489 ملرد تەڭگەسى ءتيىمسىز جۇمسالعان. ونىڭ ىشىندە 70 ملرد تەڭگە يگەرىلمەگەن، 87 ملرد تەڭگە قازىنالىق شوتتا قالىپ قويعان. ەڭ وكىنىشتىسى، بۇل جىلدان جىلعا قايتالانىپ كەلەدى. بۇدان بولەك، ەل بولىپ تاباتىنىمىز – 14,5 تريلليون تەڭگە، ال جۇمسايتىنىمىز – شامامەن 23 ترلن. ياعني 35 پروتسەنت مەملەكەتتىك بيۋدجەت قارىزدان، قوردان قۇرالادى. بۇل – وتە قاۋىپتى قۇبىلىس، ياعني قارجىلىق بالانس جوق»، – دەدى دەپۋتات.
