الەۋمەتتىك جەلىدە ءماجىلىس دەپۋتاتى رۋسلان بەردەنوۆتىڭ بيىك عيماراتقا شىعىپ جاريالاعان ۆيدەوسى قىزۋ تالقىلانعان بولاتىن. وسىعان بايلانىستى Respublica پارتياسىنىڭ توراعاسى ايداربەك قوجانازاروۆ پىكىر ءبىلدىردى، دەپ حابارلايدى “ادىرنا” ءتىلشىسى.
“بىرىنشىدەن، بۇل Respublica پارتياسىنىڭ باستاعان اكتسياسى ەمەس. بۇل ناقتى دەپۋتات بەردەنوۆتىڭ ءوزىنىڭ جەكە ۋاقىتىندا، ياعني ەستۋىم بويىنشا الەۋمەتتىك ماقساتتا تۇرىرگەن ۆيدەوبەينەسى. ۇلكەن الەۋمەتتىك جوبا قاتىستى وسىنداي ۆيدەو جاساعان. شىنى كەرەك بۇل مەنىمەن جانە باسقا دا پارتيا مۇشەلەرىمەن كەلىسىلگەن جوق. بىراق مەنىڭ ويىمشا دەپۋتات تا ادام عوي، ءوزىنىڭ بوس ۋاقىتىندا قانداي بەينە ءتۇسىرىپ، زاڭدى بۇزباسا بولدى ەمەس پە؟ سونىمەن قاتار، دەپۋتاتتىڭ ارەكەتى زاڭ قابىلداۋ جۇمىستارىنا اسەر ەتپەسە، ەركىن ەلدە ءومىر سۇرگەننەن كەيىن ءار ادامنىڭ ءوز قۇقىعى بار. ءوز باسىم ارىپتەسىمنىڭ ارەكەتىن قۇپتايمىن نەمەسە قۇپتامايمىن دەپ باعا بەرە المايمىن. ونى دەپۋتات بەردەنوۆ مىرزادان سۇراۋىڭىز قاجەت”، – دەدى ول.
ارىپتەستەردىڭ ءبىرى «بۇل بەينەجازبا «Respublica» پارتياسىنىڭ بەدەلىنە اسەر ەتپەي مە؟» دەپ سۇراق قويدى.
“Respublica پارتياسى تەك دەپۋتات بەردەنوۆ نەمەسە ايداربەك قوجانازاروۆ ەمەس. بىزگە داۋىس بەرگەندەر قانشاما ادام بار جانە بىزدە 8 تەڭ توراعا بار. سوندىقتان پارتياعا ءبىر ادامنىڭ ىستەگەن جاقسىلىعى دا، جاماندىعى دا قاتتى اسەر ەتپەيدى دەپ ويلايمىن. سەبەبى، ءبىزدىڭ ءوزىمىزدىڭ سايلاۋالدى باعدارلامامىز بەن كوتەرىپ جاتقان سۇراقتارىمىز بار. مەنىڭ ويىمشا، ءبىزدىڭ بەدەلىمىزگە تەك جاساپ جاتقان ناقتى جۇمىسىمىز اسەر ەتەدى. ەگەر وتىرىستاردا دۇرىس جۇمىس ىستەمەي، بىراق ادەمى بولىپ سىرتتا جۇرسەك وسى كەرى اسەر ەتەدى. مەنىڭ ويىمشا، ءبىز دەپۋتاتتىڭ ارەكەتىنە قاتتى كوڭىل ءبولىپ جاتقان سياقتىمىز. بۇل جاي عانا الەۋمەتتىك بەينەجازبا. مىسالى شەنەۋنىكتەردىڭ اۋىزىنان حالىققا «كوپ اقشا تابىڭدار» دەگەن سوزدەر شىعىپ كەتىپ جاتادى. ايتالىق وسى ءسوز ۇكىمەتتىڭ بەدەلىنە اسەر ەتەتىن شىعار. بىراق تەك ۆيدەوجازبانىڭ ءبىزدىڭ پاريانىڭ ابىرويىنا داق كەلتىرەدى دەپ ويلامايمىن”، – دەدى دەپۋتات.
بۇعان دەيىن الەۋىمەتتىك جەلىدە رۋسلان بەردەنوۆتىڭ ەلورداداعى ەڭ ءزاۋلىم عيمارات – ءابۋ-دابي پلازانىڭ توبەسىندە سۋپەرقاھارمان شەكپەنىمەن شىققانى جاريالانعان بولاتىن. دەپۋتاتتىڭ ءوزى مۇنى الەۋمەتتىك بەينەروليكتىڭ ءبىر بولىگى دەپ ءتۇسىندىردى.
