الەۋمەتتىك جەلىلەردە اقتوبەلىك دەپۋتاتتىڭ بەتاشارداعى ارەكەتتى جۇرتتىڭ نازارىن اۋداردى، دەپ حابارلايدى "ادىرنا" ۇلتتىق پورتالى.
كادرلاردا اقتوبە قالالىق ءماسليحاتىنىڭ دەپۋتاتى ءارى كاسىپكەر اسلان قايىرعاليەۆتىڭ بەتاشاردا 4 ميلليون تەڭگە كولەمىندەگى اقشا بەرگەنى بايقالادى. بۇل جايت جەلى قولدانۋشىلارى اراسىندا ءتۇرلى پىكىر تۋدىردى.
جەلىدە تاراعان سىن-پىكىرلەردەن كەيىن دەپۋتات ءوز پاراقشاسىندا بەينەۇندەۋ جاريالاپ، جاعدايعا تۇسىنىكتەمە بەردى. ونىڭ ايتۋىنشا، اتالعان توي بالا كۇننەن بىرگە وسكەن جاقىن دوسىنىڭ قۋانىشى بولعان. ال ۆيدەودا كورسەتىلگەن اقشا ونىڭ جەكە قاراجاتى ەمەس، دوستارىنىڭ اتىنان جينالعان سىيلىق.
«مەن بۇل تويدا جىگىت جولداس بولدىم. سىيلىقتى بارشا دوستاردىڭ اتىنان تابىستادىم. اقشانى ساناۋ ءساتى سىرت كوزگە وعاش كورىنۋى مۇمكىن ەكەنىن ەندى ءتۇسىنىپ وتىرمىن. مۇندا ماقتانۋ نەمەسە نازار اۋدارتۋ نيەتى بولعان جوق. بۇل تەك جاقىن دوسىمنىڭ قۋانىشىنداعى ەموتسيالىق ءسات ەدى»، – دەدى ول.
