كەيدە اياعى تالتاق بۇلدىرشىندەردى، بەلى مەن ومىرتقاسى قيسىق بولعاندىقتان، قيسايىپ جۇرەتىن بالالاردى كورىپ قالاسىڭ.
ال ۇلكەندەر اراسىندا تايىپ جىعىلسا نەمەسە اياعىڭدى انتەك باسىپ، قۇلاعانىندا ءبىر جەرى بىردەن مەرتىگەتىن ادامدار بولادى. ءتىپتى سپورت ويىندارىنا قاتىسسا بولدى، قولىن نەمەسە اياعىن اندا-ساندا ەمەس، ءجيى سىندىرىپ الاتىندار كەزدەسەدى. «كوز تيگەن، ءتىل تيگەن، يا بولماسا، ءسوز تيگەن» دەپ وزىڭشە دياگنوز قويىپ، مولداعا اپارىپ ۇشكىرتە بەرمەي، دارىگەرگە قارالعان ءجون.
ءبىز ادام اعزاسىنا وتە قاجەتتى D دارۋمەنىن زەرتتەپ جۇرگەن قر پرەزيدەنتىنىڭ ءىس باسقارماسىنىڭ مەديتسينالىق ورتالىعىنا قاراستى الماتىداعى «Almaty Resort» شيپاجايىنداعى دارىگەر ريزابول ورازباەۆا جانە باس مامان گۇلنار نۇرپەيىسوۆامەن اڭگىمەلەستىك.
- سىزدەردىڭ شيپاجايلارىڭىزدا D دارۋمەنىنە زەرتحانالىق تەكسەرۋ ەنگىزىلگەنىن ەستىدىك؟ ول نەندەي ءتاسىل؟ قىسقاشا سيپاتتاپ بەرە الاسىز با؟
- 2024 جىلى ءبىزدىڭ زەرتحانالىق ساراپتاۋ پرەيسكۋرانتىمىز كەڭەيدى. سولاردىڭ ءبىرى D total دارۋمەنىنىڭ كولەمىن انىقتاۋ. ناۋقاستىڭ قانىن الامىز دا، گەرمانيادان اكەلىنگەن قوندىرعىنىڭ ارقاسىندا ساراپتايمىز.
- D دارۋمەنىن انىقتاۋ ءۇشىن قانداي رەاگەنتتەردى قولداناسىزدار؟
- رەسمي جەتكىزۋشىنىڭ رەاگەنتتەرىن قولدانامىز. ءار رەاگەنتتىڭ جاڭا پارتياسىنىڭ كاليبرى ولشەنەدى جانە اناليزاتور قوندىرعىدان باقىلاۋدان وتەدى. سودان كەيىن عانا بارىپ، ناۋقاستىڭ قانىن ساراپتاۋعا كىرىسەمىز.
- ساراپتامادان سوڭ ناۋقاستى قانداي ادىسپەن ەمدەيسىزدەر؟
- بىزگە تەكسەرۋگە دە دارىگەر جىبەرەدى، تەكسەرۋدەن سوڭ قالاي ەمدەلۋىن دە دارىگەر شەشەدى. ءار ادامدى ارقالاي ەمدەيدى عوي، ءبارى دە سول قانىنداعى D دارۋمەننىڭ كولەمىنە بايلانىستى. ساراپتامادا «قالىپتى، جەتكىلىكسىز، از، وتە از» دەپ بەلگىلەنەدى. دارىگەر وسىعان قارايدى جانە ناۋقاستىڭ جاسى، دەنساۋلىعىنا، ت.ب. ءارتۇرلى جاعدايعا قاراي ەمدەۋ ءتاسىلىن قولدانادى.
- جالپى D دارۋمەنى نەگە كەرەك؟ ودان ادامعا نە پايدا؟ ال D دارۋمەنى جەتپەسە، قانداي اۋرۋ پايدا بولۋى مۇمكىن؟
- D دارۋمەنى – مايدا ەريتىن دارۋمەن. مايلى تاماقپەن الماسۋعا تۇسەدى جانە مايلى تالشىقتاردا تۇزىلەدى. D دارۋمەنى نەگىزىنەن بالىق تاعامدارىندا (البىرت (لوسوس), جايىن، سكۋمبريا، مايشاباق (ساردينا), تۋنەتس), ۋىلدىرىعىندا جانە جۇمىرتقانىڭ سارىسى مەن ءسۇت ونىمدەرىندە مول بولادى. بۇل دارۋمەننىڭ باسقاسىنان ەرەكشەلىگى سول، كۇن ساۋلەسىنىڭ ارقاسىندا دەنەدە وزدىگىنەن پايدا بولادى. بۇدان بولەك قىزىل ۋىلدىرىق، ۇلۋ (ۋستريتسا), ورمان ساڭىراۋقۇلاعى جانە كۇنباعىس دانىندە ازداپ بار.
قازىر عالىمدار D دارۋمەنى جەتپەگەننىڭ كەسىرىنەن ونكولوگيالىق اۋرۋلار، سونىمەن قاتار اۋتويممۋن، ينفەكتسيالىق، ۆيرۋستى جانە جۇرەك-قانتامىرلارى اۋرۋلارى اسقىنادى دەپ دابىل قاعۋدا. D دارۋمەن اعزاڭىزدا جەتكىلىكتى بولسا، ءارتۇرلى ينفەكتسيانى دەرەۋ جويادى، وتە اۋىر ۆيرۋس جۇقسا، اۋرۋدىڭ جەڭىل وتۋىنە اسەرىن تيگىزىپ، ءتىپتى كوۆيد سيندرومىن دا جەڭىلدەتەدى.
- ال D دارۋمەنى وتە از ادامدى قانداي اۋرۋ مەڭدەۋى مۇمكىن؟
- بالالار راحيت، ەرەسەكتەر وستەومالياتسياعا ۇشىرايدى.
راحيت – اعزادا كالتسي مەن فوسفوردىڭ جەتىسپەۋى. تەز ءوسىپ كەلە جاتقان بالانىڭ سۇيەك كەمىگى (تالشىعى) قيسىق ءبىتۋى، ياعني قيسىق ءوسۋ مۇمكىن، ءتىپتى تەز ۇگىتىلەتىن نەمەسە ءسال سوققىدان تەز سىناتىن بولادى.
ۇلكەندەردە فوسفور مەن كالتسي ازدىعىنان سۇيەك كەمىكتەنىپ، ياعني جۇمسارىپ كەتەدى. اۋىر سالماقپەن قۇلاعاندا، كەز كەلگەن سۇيەگىڭىز سىنىپ كەتۋى كادىك.
- سىزدەر قانشا ادامدى تەكسەردىڭىزدەر؟ ساراپتاما ناتيجەسىن بىلگىم كەلەدى.
- سوڭعى بەس ايدا زەرتحانامىزدا 88 تالداۋ جۇرگىزىلدى. 18 جاستان جوعارى ادامداردى تەكسەردىك. تەكسەرىلگەندەردىڭ 35,2% D دارۋمەنى قالىپتى بولسا، 25% جەتكىلىكسىز، 33% از، 6,8% وتە از بولىپ شىقتى. بۇعان قاراپ، ءوزىڭىز قورىتىندىلاي بەرىڭىز. دۇرىس تاماقتانۋعا نازار اۋدارعان ءجون. جازدا اشىق اسپان استىندا سەرۋەندەۋ كەرەك. بىراق كۇن ساۋلەسى پايدالى ەكەن دەپ، باستان كۇن ءوتىپ كەتكەنشە ۇزاق جۇرۋگە بولمايدى. ال قىس مەزگىلىندە دارىگەردىڭ نۇسقاۋىمەن D دارۋمەنىن پايدالانىپ جۇرگەن ابزال.
زەرتحانالىق دياگنوستيكا سالاسىندا 30 جىلدان استام ۋاقىت قىزمەت ەتىپ كەلە جاتقان، ال «Almaty Resort» شيپاجايىندا 12 جىلدان اسا جۇمىس ىستەپ جۇرگەن باس مامان گۇلنار باقىتبەكقىزىنىڭ ايتۋىنشا، دارىگەرلەر ۇسىناتىن ەمدەۋ تاسىلدەرىنىڭ 70% استامى زەرتحانا ساراپتاماسىنا نەگىزدەلەدى. دارىگەر ريزابول قاسەنقىزى ەكەۋى قازاقستان حالقىنا تاۋعا كوپ شىعىپ، ساف اۋادا دەمالىپ، سۋعا كوپ شومىلۋعا، اسىرەسە دۇرىس تاماقتانۋعا كەڭەس بەرەدى.
