الماتى وبلىسىنىڭ پوليتسيا دەپارتامەنتى پروكۋراتۋرامەن بىرگە ادام اعزالارىن الىپ-ساتۋ بويىنشا قىلمىستىق سحەما ۇيىمداستىرعان توپتىڭ جولىن كەستى، دەپ حابارلايدى "ادىرنا" ۇلتتىق پورتالى Polisiakz-كە سىلتەپ.
الماتى قالاسى، الماتى، جامبىل جانە تۇركىستان وبلىستارى بويىنشا ۇيىمداسقان قىلمىسقا قارسى كۇرەس بولىمشەلەرىمەن 22 ايىپتالۋشى (ۇيىمداستىرۋشىلار، مەديتسينا قىزمەتكەرلەرى، نوتاريۋستار، رەتسيپيەنتتەر مەن دونورلار) جەتكىزىلدى، ولاردىڭ اراسىندا رەتسيپيەنتتەردى، دونورلاردى ىزدەۋ، جالعان قۇجاتتاردى وڭدەۋ جانە وپەراتسيالاردى ۇيىمداستىرۋ بويىنشا جاۋاپتىلار بارى بەلگىلى بولدى.
وپەراتسيا سوماسى 6-10 ميلليون تەڭگەنى قۇراسا، وسىنداي سەگىز فاكتى انىقتالدى. نەگىزگى ءۇش ۇيىمداستىرۋشى قاماۋعا الىندى. جەدەل-ىزدەستىرۋ شارالارىنىڭ ناتيجەسىندە كۇدىكتىلەردەن قولما-قول اقشا، قۇجاتتاما، تسيفرلىق تاسىمالداعىش جانە باسقا دا زاتتاي ايعاقتار تاركىلەندى.
«حالىق دەنساۋلىعى جانە دەنساۋلىق ساقتاۋ جۇيەسى تۋرالى» قازاقستان رەسپۋبليكاسىنىڭ كودەكسىنە سايكەس ترانسپلانتاتسيا كەزىندە ادام اعزالارى مەن تىندەرىن ساتىپ الۋعا جانە ساتۋعا تىيىم سالىنادى. قازاقستان رەسپۋبليكاسى قىلمىستىق كودەكسىنىڭ 116-بابى «ءتىرى ادامنىڭ اعزالارى مەن تىندەرىن ترانسپلانتاتسيالاۋ نەمەسە وزگە دە پايدالانۋ ءۇشىن ماجبۇرلەپ الۋ نەمەسە زاڭسىز الۋ، سول سياقتى زاڭسىز مامىلەلەر جاساۋ» بويىنشا سوتقا دەيىنگى تەرگەۋ جۇرگىزىلۋدە.
قىلمىستىق-پروتسەستىك كودەكستىڭ 201-بابىنا سايكەس وزگە دە مالىمەتتەر جاريا ەتۋگە جاتپايدى.
