قازاقستان تاعامتانۋ اكادەمياسىنىڭ پرەزيدەنتى، بەلگىلى ديەتولوگ تورەگەلدى شارمانوۆ 95 جاقا قاراعان شاعىندا دۇنيەدەن ءوتتى. اكادەميكپەن قوشتاسۋ سۋرەتى بار جازبانى عالىمنىڭ ۇلى الماز شارمان ءوزىنىڭ Facebook پاراقشاسىندا جاريالادى، - دەپ حابارلايدى “ادىرنا” ۇلتتىق پورتالى.
اسفەندياروۆ اتىنداعى مەديتسينا ۋنيۆەرسيتەتىندەگى ارىپتەستەرى دە اكادەميكتىڭ قايتىس بولعانىن حابارلادى.
«الماتى دەكلاراتسياسىنىڭ العاشقى مەديتسينالىق-سانيتارلىق كومەگىنىڭ اكەسى، الەمدىك دەنساۋلىق ساقتاۋدىڭ اڭىزى، قازاق مەديتسيناسىنىڭ ماقتانىشى، اكادەميك تورەگەلدى شارمانوۆ ومىردەن ءوتتى»، - دەلىنگەن حابارلامادا.
تورەگەلدى شارمانۇلى 19 قازان 1930 جىلى قاراعاندى وبلىسى، ۇلىتاۋ اۋدانىندا تۋعان. 1949 جىلى مەكتەپتى بىتىرىسىمەن قاراعاندى مەملەكەتتىك مەديتسينالىق ينستيتۋتىنا وقۋعا ءتۇسىپ، وتە جاقسى كورسەتكىشپەن اياقتاپ شىقتى. 1955-1958 جىلدارى قاراعاندى مەملەكەتتىك مەديتسينالىق ينستيتۋتىننىڭ اسپەرانتۋراسىن جاقسى ناتيجەدە بىتىرگەن.
1967 جىلى «مەديتسينا عىلىمدارىنىڭ دوكتورى» عىلىمي اتاعى; 1968 جىلى پروفەسسور; 1994 جىلدان باستاپ قازاقستان رەسپۋبليكاسىنىڭ ۇلتتىق عىلىم اكادەمياسىنىڭ اكادەميگى; رەسەي مەديتسينا عىلىم اكادەمياسىنىڭ اكادەميگى اتاقتارىن العان.
ۇقساس جاڭالىقتار
