قازاق مەديتسيناسىنداعى كورنەكتى تۇلعا، اكادەميك تورەگەلدى شارمانوۆتىڭ 95 جىلدىعىنا وراي س. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىندە عالىمنىڭ اتى بەرىلگەن ەرەكشە اۋديتوريا مەن داڭق زالى اشىلدى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
جاڭارتىلعان اكت زالىندا اشىلعان تورەگەلدى شارمانوۆتىڭ داڭق زالىندا رەسپۋبليكالىق جانە حالىقارالىق دەڭگەيدەگى كونفەرەنتسيالار، فورۋمدار مەن كەزدەسۋلەر وتكىزۋ جوسپارلانىپ وتىر.
سالتاناتتى شارا اياسىندا تورەگەلدى شارمانوۆ اتىنداعى حالىقارالىق ماراپات تا تابىستالدى. بيىلعى ماراپات يەگەرى — مەديتسينا عىلىمدارىنىڭ دوكتورى، پروفەسسور ماقسۇت قۇلجانوۆ. ول مىنبەرگە بايانداما جاساۋ ءۇشىن شىققاندا، سىيلىق كۇتپەگەن جەردەن تابىس ەتىلدى.
«ەڭبەگىمنىڭ جوعارى باعالانعانىنا ريزامىن. بۇل - مەن ءۇشىن ۇلكەن مارتەبە»، — دەدى پروفەسسور ماراپات الۋ ساتىندە.
ماقسۇت قۇلجانوۆ — ۇزاق جىلدار بويى دۇنيەجۇزىلىك دەنساۋلىق ساقتاۋ ۇيىمىنىڭ اتقارۋشى كوميتەتىنىڭ مۇشەسى بولىپ، بەينفەكتسيالىق اۋرۋلاردىڭ ەكونوميكاعا اسەرى مەن جاھاندىق دەنساۋلىق ساقتاۋ ماسەلەلەرىن زەرتتەگەن بەلگىلى عالىم.
ايتا كەتەيىك، تورەگەلدى شارمانوۆ — 1978 جىلى الماتىدا وتكەن ددسۇ كونفەرەنتسياسىندا قابىلدانعان ايگىلى الماتى دەكلاراتسياسىنىڭ باستاماشىسى، ءارى قازاقستاندىق مەديتسينانى حالىقارالىق دەڭگەيگە كوتەرگەن تۇلعا.
19 قازاندا قازاق تاعامتانۋ اكادەمياسىنىڭ پرەزيدەنتى، مەديتسينا عىلىمدارىنىڭ دوكتورى، پروفەسسور، كورنەكتى عالىم تورەگەلدى شارمانوۆتىڭ تۋعانىنا 95 جىل تولعانىن حابارلاعان ەدىك.
