مەنىڭ تۋىپ وسكەن جەرىم –بايلىعى وتە كوپ جانە قازىناعا باي ەل قازاقستان. قازاقستاننىڭ تابيعاتى وتە سۇلۋ. بيىك-بيىك اسقار تاۋ، ءموپ-ءمولدىر كولدەر، نەشە ءتۇرلى وسىمدىكتەر مەن دارىلىك قاسيەتى بار شوپتەر وسەدى. قازاقستان جەرىندە اڭدار مەن قۇستار، ءتۇرلى جانۋارلار مەكەندەيدى. وسى توپىراقتا ءبىزدىڭ اتا-بابالارىمىز، باتىرلارىمىز، اقىندارىمىز، عالىمدارىمىز تۋىپ ءوستى، قازاق دالاسى ءۇشىن ەرەن ەڭبەك ەتتى.
جەرى شۇرايلى، ءشوبى شۇيگىن وسىناۋ سۇلۋ ولكەنى مەن ارقاشاندا ماقتان تۇتامىن. ەلىمنىڭ دالاسىنداي بايتاق دالا ەش جەردە جوق شىعار.
حالقىمىزدا اتامەكەندى ارداقتاۋدىڭ تامىرى سوناۋ تەرەڭنەن باستالادى. جاۋگەرشىلىك زامانداردا حالقىمىزدىڭ باسىنان قانداي قيىن كەزەڭدەر وتكەنى تاريحتان ءمالىم. باتىر اتا-بابالارىمىز ەلىمىزدى سىرتقى جاۋدان قورعاپ قانا قويماي، ەرتەڭگى ۇرپاعى ءۇشىن استى مەن ءۇستى بايلىققا تولى قازاق دالاسىن ميراس ەتتى. ءوز ەلى ءۇشىن جانىن دا، بارىن دا اياماعان بابالارىمىز ءبىز ءۇشىن وسىناۋ شەكسىز بايلىقتى قالدىردى. تۋعان جەرىن ءسۇيۋ قاسيەتى جانىمىزعا انامىزدىڭ سۇتىمەن دارىپ، اتامىزدىڭ قانىمەن بويىمىزعا ءسىڭدى. وتان ءبىز ءۇشىن وتتان دا ىستىق.
تۋعان جەرىمىزدىڭ ءاربىر تاسىن كوزىمىزدىڭ قاراشىعىنداي ساقتاپ، قاستەرلەۋ قازىرگى ۇرپاق ءبىز ءۇشىن ۇلكەن پارىز سانالادى. كەشەگى بابالارىمىز بىزگە ميراسقا قالدىرعان بۇل بايتاق دالانى ءبىز ەندى كەلەر ۇرپاققا اماناتتاۋعا ءتيىسپىز. مىنە، سول ءۇشىن دە تۋعان جەرگە دەگەن اسقاق ماحابباتىمىزدىڭ دالەلى رەتىندە ءومىرىمىزدىڭ ءاربىر كۇنىن قازاق ەلىنىڭ كوركەيۋى ءۇشىن ارناۋىمىز كەرەك. وتان وتباسىدان باستالادى دەگەندەي، تۋعان جەرگە دەگەن ماحابباتتىڭ دانە ەڭ الدىمەن ءوز ۇيىمىزدەن باستالادى. ماسەلەن، تاياۋدا ءبىزدىڭ اۋىلىمىز اقشوقىدا ەلىمىز ءۇشىن دەگەن ماقساتپەن كوپتەگەن جۇمىس، ءىس-شارانى جۇزەگە اسىرۋ قولعا الىندى. اپتانىڭ ءار دۇيسەنبى جانە بەيسەنبى كۇندەرىن تازالىق دەپ جاريالاپ، اۋىلىمىزدى تۇتاس قوقىستان تازارتامىز. ال ءار ايدىڭ ەكى كۇنىن قورشاعان تابيعاتقا ارنايمىز. ول كۇندەرى اۋىلداعى اعاشتارعا كۇتىم جاساپ، جول جيەگىندەگى گۇل-جەلەكتەرىنىڭ جايقالۋىنا بار كۇشىمىزدى سالامىز. وسى كۇندەرى اۋىل سىرتىنداعى ءشوپتى شاۋىپ، ارىقتاردى دا تازالايمىز. بۇل جۇمىستاردىڭ بەلگىلى ءبىر تارتىپپەن جۇيەلەنگەنى سونداي، قازىرگى كەزدە مەكتەپ جاسىنداعى كىشكەنتاي بالالار دا ۇلكەندەرمەن ىلەسىپ، اۋىل ءۇشىن اكتسياسىنا ارالاسۋدا.
اۋىل سىرتىنا كوگالداندىرۋ ماقساتىندا ءوزىمىز قاداعان ءاربىر شىبىق بۇگىندە جايقالعان ماۋەلى اعاش بولىپ، جاپىراعىن جايعان. وسىنداي ءتارتىپ قالىپتاسقان اۋىلىمىزدا سوڭعى ون جىلدىڭ كولەمىندە «تۋعان جەرگە قىزمەت» دەگەن تاقىرىپپىن دە ۇلكەن جۇمىس اتقارىلادى. وسى اۋىلدا تۋىپ، وسى اۋىلدان تۇلەپ ۇشقان ازاماتتار مەكتەپتەگى ون، جيىرما جىلدىق سياقتى كەزدەسۋلەردە باس قوسقاندا تۋعان جەرى ءۇشىن ماڭىزدى شارۋانى اتقارۋدى قولعا الادى. بيىلعى جيىرما جىلدىق كەزدەسۋگە جينالعان اۋىلىمىزدىڭ قىز-جىگىتتەرى كوشەنىڭ تۇنگى شامدارىن تۇگەل جاڭارتىپ، اۋىلداعى كوشەلەردىڭ بارلىعىن جارىقپەن جابدىقتادى. ال بىلتىر اۋىلىمىزدان ءبىلىم الۋعا، جۇمىس ىستەۋگە سىرتقا كەتكەن اعا-اپكەلەرىمىز اۋىلىمىزدى كەسىپ اعاتىن بىرنەشە ارىققا كوپىر سالىپ بەردى. «تۋعان جەرىمە قىزمەت ەتۋگە ءاردايىم دايىنمىن. بۇل قىزمەت مەنىڭ ادامدىق پارىزىم!» دەپ جازىلعان تاقتايشالاردى ءبىزدىڭ اۋىلدان كوپتەپ كەزدەستىرۋگە بولادى. ءاربىر تاقتايشاداعى تاڭبا وسى توپىراقتان شىققان ازاماتتىڭ قولتاڭباسى. الدىڭعى بۋىن اعا-اپكەلەرىمىز بىزگە وسىلاي ۇلگى بولۋدا. ال ولاردىڭ ءىسىن جالعاستىرۋ قازىرگى بۋىن بىزگە دە پارىز سانالماق. ءوز تۋعان جەرىمىزگە دەگەن شىنايى، تەرەڭ سۇيىسپەنشىلىگىمىزدى ءبىز وسىلاي دالەلدەگىمىز كەلەدى.
گۇلدانا شىمىربايقىزى.
بۇل ماقالا ازاماتتىق باستامالاردى قولداۋ ورتالىعىنىڭ
«تۋعان جەر» گرانتتىق جوباسى اياسىندا جازىلدى.
"ادىرنا" ۇلتتىق پورتالى
