Týǵan jerge qyzmet etý – árbir adamnyń azamattyq boryshy!

212

Meniń týyp ósken jerim –baılyǵy óte kóp jáne qazynaǵa baı el Qazaqstan. Qazaqstannyń tabıǵaty óte sulý. Bıik-bıik asqar taý, móp-móldir kólder, neshe túrli ósimdikter men dárilik qasıeti bar shópter ósedi. Qazaqstan jerinde ańdar men qustar, túrli janýarlar mekendeıdi. Osy topyraqta bizdiń ata-babalarymyz, batyrlarymyz, aqyndarymyz, ǵalymdarymyz týyp ósti, Qazaq dalasy úshin eren eńbek etti.
Jeri shuraıly, shóbi shúıgin osynaý sulý ólkeni men árqashanda maqtan tutamyn. Elimniń dalasyndaı baıtaq dala esh jerde joq shyǵar.
Halqymyzda atamekendi ardaqtaýdyń tamyry sonaý tereńnen bastalady. Jaýgershilik zamandarda halqymyzdyń basynan qandaı qıyn kezeńder ótkeni tarıhtan málim. Batyr ata-babalarymyz elimizdi syrtqy jaýdan qorǵap qana qoımaı, erteńgi urpaǵy úshin asty men ústi baılyqqa toly Qazaq dalasyn mıras etti. Óz eli úshin janyn da, baryn da aıamaǵan babalarymyz biz úshin osynaý sheksiz baılyqty qaldyrdy. Týǵan jerin súıý qasıeti janymyzǵa anamyzdyń sútimen daryp, atamyzdyń qanymen boıymyzǵa sińdi. Otan biz úshin ottan da ystyq.
Týǵan jerimizdiń árbir tasyn kózimizdiń qarashyǵyndaı saqtap, qasterleý qazirgi urpaq biz úshin úlken paryz sanalady. Keshegi babalarymyz bizge mırasqa qaldyrǵan bul baıtaq dalany biz endi keler urpaqqa amanattaýǵa tıispiz. Mine, sol úshin de týǵan jerge degen asqaq mahabbatymyzdyń dáleli retinde ómirimizdiń árbir kúnin Qazaq eliniń kórkeıýi úshin arnaýymyz kerek. Otan otbasydan bastalady degendeı, týǵan jerge degen mahabbattyń dáne eń aldymen óz úıimizden bastalady. Máselen, taıaýda bizdiń aýylymyz Aqshoqyda elimiz úshin degen maqsatpen kóptegen jumys, is-sharany júzege asyrý qolǵa alyndy. Aptanyń ár dúısenbi jáne beısenbi kúnderin tazalyq dep jarııalap, aýylymyzdy tutas qoqystan tazartamyz. Al ár aıdyń eki kúnin qorshaǵan tabıǵatqa arnaımyz. Ol kúnderi aýyldaǵy aǵashtarǵa kútim jasap, jol jıegindegi gúl-jelekteriniń jaıqalýyna bar kúshimizdi salamyz. Osy kúnderi aýyl syrtyndaǵy shópti shaýyp, aryqtardy da tazalaımyz. Bul jumystardyń belgili bir tártippen júıelengeni sondaı, qazirgi kezde mektep jasyndaǵy kishkentaı balalar da úlkendermen ilesip, aýyl úshin akııasyna aralasýda.
Aýyl syrtyna kógaldandyrý maqsatynda ózimiz qadaǵan árbir shybyq búginde jaıqalǵan máýeli aǵash bolyp, japyraǵyn jaıǵan. Osyndaı tártip qalyptasqan aýylymyzda sońǵy on jyldyń kóleminde «Týǵan jerge qyzmet» degen taqyryppyn de úlken jumys atqarylady. Osy aýylda týyp, osy aýyldan túlep ushqan azamattar mekteptegi on, jıyrma jyldyq sııaqty kezdesýlerde bas qosqanda týǵan jeri úshin mańyzdy sharýany atqarýdy qolǵa alady. Bıylǵy jıyrma jyldyq kezdesýge jınalǵan aýylymyzdyń qyz-jigitteri kósheniń túngi shamdaryn túgel jańartyp, aýyldaǵy kóshelerdiń barlyǵyn jaryqpen jabdyqtady. Al byltyr aýylymyzdan bilim alýǵa, jumys isteýge syrtqa ketken aǵa-ápkelerimiz aýylymyzdy kesip aǵatyn birneshe aryqqa kópir salyp berdi. «Týǵan jerime qyzmet etýge árdaıym daıynmyn. Bul qyzmet meniń adamdyq paryzym!» dep jazylǵan taqtaıshalardy bizdiń aýyldan kóptep kezdestirýge bolady. Árbir taqtaıshadaǵy tańba osy topyraqtan shyqqan azamattyń qoltańbasy. Aldyńǵy býyn aǵa-ápkelerimiz bizge osylaı úlgi bolýda. Al olardyń isin jalǵastyrý qazirgi býyn bizge de paryz sanalmaq. Óz týǵan jerimizge degen shynaıy, tereń súıispenshiligimizdi biz osylaı dáleldegimiz keledi.

Gúldana Shymyrbaıqyzy.
Bul maqala Azamattyq bastamalardy qoldaý ortalyǵynyń

«Týǵan jer» granttyq jobasy aıasynda jazyldy.

"Adyrna" ulttyq portaly

Pikirler