باتىس قازاقستان وبلىسىنىڭ جوعارى سىنىپ وقۋشىلارى اراسىندا «مەن بولاشاق كاسىپكەرمىن» بايقاۋى دءاستۇرلى تۇردە ءوتىپ كەلەدى. بايقاۋ بقو كاسىپكەرلەر پالاتاسىنىڭ الاڭىندا ءتورتىنشى مارتە باتىس قازاقستان وبلىسى ءبىلىم باسقارماسى، وبلىستىق كاسىپكەرلەر پالاتاسى مەن «AMANAT» پارتياسىنىڭ وبلىستىق فيليالىنىڭ قولداۋىمەن, «دارىن» قوسىمشا ءبىلىم ورتالىعىنىڭ ۇيىمداستىرۋىمەن وزدىرىلىپ وتىر.
جوبانىڭ اۆتورى ورال قالالىق ءماسليحاتىنىڭ دەپۋتاتى, «AMANAT» پارتياسى وبلىستىق فيليال جانىنداعى وتباسى جانە حالىقتى الەۋمەتتىك قورعاۋ جونىندەگى كەڭەس ءتورايىمى ءازيما عۇباشەۆا. وڭىرلىك كاسىپكەرلەر پالاتاسى بۇل باستامانى قولداپ، بقو كاسىپكەرلەر پالاتاسىنىڭ ديرەكتورى ماقسات قۇلانباەۆ قازىلار القاسىنىڭ قۇرامىنان تابىلدى.
اۋداندىق جانە قالالىق كەزەڭنەن وتكەن 12 جۇمىس وبلىستىق بايقاۋعا قاتىستى. وقۋشىلاردىڭ بيزنەس-جوبالارىنىڭ مازمۇنى ەرەكشە بولدى. بالالار قاراپايىم قويدىڭ قۇيرىق مايىنان تازا ەكولوگيالىق ءونىم الۋ جانە ساتۋ, باربەرشوپ سالونىن اشۋ، گيپستەن بۇيىمدار جاساۋ باعىتىندا تىڭ باستامالارىمەن ءبولىستى.
– اتالمىش بايقاۋ – وقۋشىلارعا كاسىپتىك باعدار بەرۋ ورتالىعىمەن بىرگە وتكىزە باستاعان كاسىبي دەڭگەيدەگى مەكتەپتىڭ كاسىپتىك باعدار بەرۋ جۇمىسىنىڭ ءبىرىنشى كەزەڭى. جوبا جاستاردى مەكتەپ قابىرعاسىنان باستاپ نارىقتىق ەكونوميكا قاعيداتتارىنا ۇيرەتۋگە باعىتتالعان. ءبىزدى قىزىقتىرعان تاقىرىپتار بولدى. مىسالى، قۇيرىق مايدان ءونىمدى قالاي الۋعا بولاتىنى، قالاي ساتاتىنى تۋرالى, ەكولوگيالىق باعىتتاعى جوبالار، مەكتەپتەگى كينو، مەكتەپ جاعدايىنداعى چات-بوت، كونديتەرلىك بۇيىمدار شىعارۋ تاقىرىپتارىندا وقۋشىلار اۋداندىق، قالالىق دەڭگەيدەگى بايقاۋلاردىڭ جەڭىمپازى رەتىندە جۇمىستارىن جۇرگىزىپ وتىر، – دەيدى جوبا اۆتورى ءازيما زينناتقىزى.
ورال قالاسى، №42 «اق نيەت» گيمنازياسىنىڭ 10 سىنىپ وقۋشىلارى نۇرسەزىم داۋىلباي مەن ادەمى احمەتتىڭ «قۇيرىق مايدان تازا ەكولوگيالىق ءونىم الۋ جانە ساتۋ» بيزنەس جوباسى قازىلار القاسىنا وتە ۇنادى. ساراپشىلار بيزنەس-جوبانىڭ ساۋاتتى ۇسىنىلۋىن عانا ەمەس، ونىڭ ساپالى مازمۇنىن دا اتاپ ءوتتى.
– قويدىڭ مايى مىڭ اۋرۋعا ەم. قۇيرىق ماي تاريحتان بەرى اتا-بابامىز كۇندەلىكتى تۇرمىستا قولدانىپ كەلە جاتقان قورەكتىك قۋاتى مول، شيپالىق قاسيەتى زور، ۇرپاقتان-ۇرپاققا جالعاسقان قاسيەتتى ازىقتاردىڭ ءبىرى. كوپتەگەن جىلدار بويى مايدى كوپتەگەن اۋرۋلاردى، اسىرەسە سۋىق ءتيۋدى ەمدەۋ ءۇشىن ءداستۇرلى مەديتسينا رەتسەپتەرىندە قولدانادى. قۇيرىق مايدىڭ كومەگىمەن تراحەيت، برونحيت، برونحوپنەۆمونيا سياقتى تىنىس الۋ جولدارىنىڭ اۋرۋلارى دا ءساتتى ەمدەلەدى. سونداي-اق تەرىنى جاقسارتادى. تەرى كۇتىمىنە جاعاتىن جاقپا مايعا بادام، كاستور مايى، حوش يىستەندىرگىش لاۆاندا جانە قۇيرىق مايى قوسىلعان. وسىلايشا ەرىتىلگەن قۇيرىق مايدان جەكە برەندىمىزدى جاساپ شىعارعىمىز كەلەدى. بەس ءتۇرلى ءونىمدى ساتىپ كوردىك. قۇيرىق مايدى ساتۋعا ارنايى ينستا پاراقشا اشتىق، – دەيدى بولاشاق كاسىپكەرلەر. قوس بويجەتكەننىڭ اتالمىش جوباسى بايقاۋدىڭ ەڭ ۇزدىك جوباسى دەپ تانىلدى.
ساراپشىلار «Ali Barberrs» باربەرشوپ سالونى» بيزنەس جوباسىن ۇسىنعان قاراتوبە اۋدانى ق.جۇماليەۆ اتىنداعى قاراتوبە مەكتەپ-گيمنازياسىنىڭ 10 سىنىپ وقۋشىسى ءالي كاريموۆ پەن جاڭاقالا اۋدانىنداعى №3 ورتا مەكتەبىءنىڭ 10 سىنىپ وقۋشىسى ديليارا ابىلقاسىموۆانىڭ «ەكوونىمدەر» بيزنەس جوباسىن ەكىنشى ورىنعا لايىق سانادى.
اقجايىق اۋدانى ى.التىنسارين اتىنداعى جوببم-ءنىڭ 10 سىنىپ وقۋشىسى كاميلا تالعاتقىزىنىڭ «Tasty cake ءۇي پىسىرمەلەرى»، بايتەرەك اۋدانى اباي اتىنداعى مەكتەپ-گيمنازيا ينتەرناتىنىڭ 10 سىنىپ وقۋشىسى اداباي سەرىكجاننىڭ «CHATBOT – زامان تالابى»، ءبورلى اۋدانى، اقساي قالاسىنىڭ №7 ورتا مەكتەبىءنىڭ 10 سىنىپ وقۋشىسى اياۋلىم لەسوۆانىڭ «ترەندتەگى تاۋار گيپسپەن جاسالعان بۇيىمدار» بيزنەس جوبالارى ۇشىنشى ورىننان كورىندى.
– بيزنەس جوبانىڭ جاڭاشىلدىعى – سايكەستىگى مەن بەزەندىرىلۋى، جاس بۋىننىڭ زەرتتەگەن سالاسىن جەتىك مەڭگەرۋىندە بولدى. بيزنەسكە ەرتە جاستان بەت بۇرعانى وتە دۇرىس، سەبەبى ەكونوميكانىڭ نەگىزگى قوزعاۋشى كۇشى كاسىپكەرلىك. سول ءۇشىن مۇنداي جوبالاردىڭ ماڭىزى زور، – دەيدى بقو كاسىپكەرلەر پالاتاسىنىڭ ديرەكتورى ماقسات قۇلانباەۆ.
بيزنەس جوبا بايقاۋىن «باقىتتى وتباسى» پارتيالىق جوبا اياسىندا «Alem Qoldau» قوعامدىق بىرلەستىكتىگى قارجىلاندىرىپ، جەڭىمپازدارعا ديپلومدار مەن باعالى سىيلىقتار تابىستالدى.
ايتا كەتۋ كەرەك، قازىرگى تاڭدا «كاسىپكەرلىك جانە بيزنەس نەگىزدەرى» ءپانىنىڭ وقۋ باعدارلاماسىنا ەنگىزىلۋى ناتيجەسىن بەرۋدە. وقۋشىلار ساباقتا بيزنەستىڭ قىر-سىرىن تەرەڭ مەڭگەرىپ، بيزنەس جوسپار قۇرىپ، شىعىن مەن تابىس كولەمىن ەسەپتەۋگە داعدىلانادى، قارجىلىق ساۋاتتىلىعى ارتادى. بۇگىندە ءوڭىر جاستارى قاناتقاقتى جوبالار ويلاپ تاۋىپ، بيزنەسكە قادام باسۋدا.
