Batys Qazaqstan oblysynyń joǵary synyp oqýshylary arasynda «Men bolashaq kásipkermin» baıqaýy dástúrli túrde ótip keledi. Baıqaý BQO Kásipkerler palatasynyń alańynda tórtinshi márte Batys Qazaqstan oblysy bilim basqarmasy, oblystyq Kásipkerler Palatasy men «AMANAT» partııasynyń oblystyq fılıalynyń qoldaýymen, «Daryn» qosymsha bilim ortalyǵynyń uıymdastyrýymen ozdyrylyp otyr.
Jobanyń avtory Oral qalalyq máslıhatynyń depýtaty, «AMANAT» partııasy oblystyq fılıal janyndaǵy Otbasy jáne halyqty áleýmettik qorǵaý jónindegi keńes tóraıymy Ázıma Ǵubasheva. Óńirlik kásipkerler palatasy bul bastamany qoldap, BQO kásipkerler palatasynyń dırektory Maqsat Qulanbaev qazylar alqasynyń quramynan tabyldy.
Aýdandyq jáne qalalyq kezeńnen ótken 12 jumys oblystyq baıqaýǵa qatysty. Oqýshylardyń bıznes-jobalarynyń mazmuny erekshe boldy. Balalar qarapaıym qoıdyń quıryq maıynan taza ekologııalyq ónim alý jáne satý, barbershop salonyn ashý, gıpsten buıymdar jasaý baǵytynda tyń bastamalarymen bólisti.
– Atalmysh baıqaý – oqýshylarǵa kásiptik baǵdar berý ortalyǵymen birge ótkize bastaǵan kásibı deńgeıdegi mekteptiń kásiptik baǵdar berý jumysynyń birinshi kezeńi. Joba jastardy mektep qabyrǵasynan bastap naryqtyq ekonomıka qaǵıdattaryna úıretýge baǵyttalǵan. Bizdi qyzyqtyrǵan taqyryptar boldy. Mysaly, quıryq maıdan ónimdi qalaı alýǵa bolatyny, qalaı satatyny týraly, ekologııalyq baǵyttaǵy jobalar, mekteptegi kıno, mektep jaǵdaıyndaǵy chat-bot, kondıterlik buıymdar shyǵarý taqyryptarynda oqýshylar aýdandyq, qalalyq deńgeıdegi baıqaýlardyń jeńimpazy retinde jumystaryn júrgizip otyr, – deıdi joba avtory Ázıma Zınnatqyzy.
Oral qalasy, №42 «Aq nıet» gımnazııasynyń 10 synyp oqýshylary Nursezim Daýylbaı men Ádemi Ahmettiń «Quıryq maıdan taza ekologııalyq ónim alý jáne satý» bıznes jobasy qazylar alqasyna óte unady. Sarapshylar bıznes-jobanyń saýatty usynylýyn ǵana emes, onyń sapaly mazmunyn da atap ótti.
– Qoıdyń maıy myń aýrýǵa em. Quıryq maı tarıhtan beri ata-babamyz kúndelikti turmysta qoldanyp kele jatqan qorektik qýaty mol, shıpalyq qasıeti zor, urpaqtan-urpaqqa jalǵasqan qasıetti azyqtardyń biri. Kóptegen jyldar boıy maıdy kóptegen aýrýlardy, ásirese sýyq tııýdi emdeý úshin dástúrli medıına reepterinde qoldanady. Quıryq maıdyń kómegimen traheıt, bronhıt, bronhopnevmonııa sııaqty tynys alý joldarynyń aýrýlary da sátti emdeledi. Sondaı-aq terini jaqsartady. Teri kútimine jaǵatyn jaqpa maıǵa badam, kastor maıy, hosh ıistendirgish lavanda jáne quıryq maıy qosylǵan. Osylaısha eritilgen quıryq maıdan jeke brendimizdi jasap shyǵarǵymyz keledi. Bes túrli ónimdi satyp kórdik. Quıryq maıdy satýǵa arnaıy ınsta paraqsha ashtyq, – deıdi bolashaq kásipkerler. Qos boıjetkenniń atalmysh jobasy baıqaýdyń eń úzdik jobasy dep tanyldy.
Sarapshylar «Ali Barberrs» barbershop salony» bıznes jobasyn usynǵan Qaratóbe aýdany Q.Jumalıev atyndaǵy Qaratóbe mektep-gımnazııasynyń 10 synyp oqýshysy Álı Karımov pen Jańaqala aýdanyndaǵy №3 orta mektebiniń 10 synyp oqýshysy Dılıara Ábilqasymovanyń «Ekoónimder» bıznes jobasyn ekinshi orynǵa laıyq sanady.
Aqjaıyq aýdany Y.Altynsarın atyndaǵy JOBBM-niń 10 synyp oqýshysy Kámıla Talǵatqyzynyń «Tasty cake úı pisirmeleri», Báıterek aýdany Abaı atyndaǵy mektep-gımnazııa ınternatynyń 10 synyp oqýshysy Adabaı Serikjannyń «CHATBOT – zaman talaby», Bórli aýdany, Aqsaı qalasynyń №7 orta mektebiniń 10 synyp oqýshysy Aıaýlym Lesovanyń «Trendtegi taýar gıpspen jasalǵan buıymdar» bıznes jobalary úshinshi orynnan kórindi.
– Bıznes jobanyń jańashyldyǵy – sáıkestigi men bezendirilýi, jas býynnyń zerttegen salasyn jetik meńgerýinde boldy. Bızneske erte jastan bet burǵany óte durys, sebebi ekonomıkanyń negizgi qozǵaýshy kúshi kásipkerlik. Sol úshin mundaı jobalardyń mańyzy zor, – deıdi BQO kásipkerler palatasynyń dırektory Maqsat Qulanbaev.
Bıznes joba baıqaýyn «Baqytty otbasy» partııalyq joba aıasynda «Alem Qoldau» qoǵamdyq birlestiktigi qarjylandyryp, jeńimpazdarǵa dıplomdar men baǵaly syılyqtar tabystaldy.
Aıta ketý kerek, qazirgi tańda «Kásipkerlik jáne bıznes negizderi» pániniń oqý baǵdarlamasyna engizilýi nátıjesin berýde. Oqýshylar sabaqta bıznestiń qyr-syryn tereń meńgerip, bıznes jospar quryp, shyǵyn men tabys kólemin esepteýge daǵdylanady, qarjylyq saýattylyǵy artady. Búginde óńir jastary qanatqaqty jobalar oılap taýyp, bızneske qadam basýda.
