پرەمەر-ءمينيسترى ولجاس بەكتەنوۆ ريددەردەگى جۇمىستاردى كۇشەيتۋ ءۇشىن ۇكىمەت رەزەرۆىنەن قوسىمشا قاراجات ءبولۋ تۋرالى قاۋلىعا قول قويدى. بۇل تۋرالى ۇكىمەتتىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ۇكىمەت ەلىمىزدىڭ جىلۋمەن جابدىقتاۋ جۇيەسىن كەشەندى تۇردە جاڭعىرتۋ جۇمىستارىن جۇرگىزىپ جاتىر.
مالىمەت بويىنشا، ريددەردىڭ جىلۋ جەلىلەرىنە بىلتىر جۇرگىزىلگەن جوندەۋ-قالپىنا كەلتىرۋ جۇمىستارى ولاردىڭ توزۋ دەڭگەيىن 78,8%-عا دەيىن تومەندەتۋگە مۇمكىندىك بەردى. الايدا، بۇل تۇرعىنداردى جىلۋمەن ۇزدىكسىز قامتاماسىز ەتۋ ءۇشىن ءالى دە جەتكىلىكسىز. جالپى العاندا، وتكەن جىلىتۋ ماۋسىمىندا جىلۋ جەلىلەرىندە 25 تەحنولوگيالىق بۇزۋشىلىق فاكتىسى تىركەلدى، سونىڭ سالدارىنان تۇتىنۋشىلار ءۇشىن شەكتەۋلەر ەنگىزىلدى.
كەيىنگە قالدىرۋعا بولمايتىن قاجەتتى شۇعىل جۇمىستاردى ەسكەرە وتىرىپ، قر ۇكىمەتى رەزەرۆىنەن ريددەر قالاسىنىڭ "ۆودوكانال" جىلۋ جەلىلەرىن كۇردەلى جوندەۋگە 2,4 ملرد تەڭگەدەن استام قاراجات ءبولدى. بۇل ولاردىڭ توزۋ دەڭگەيىن جارامدى كورسەتكىشتەرگە دەيىن جەتكىزۋگە جانە قىسقى كەزەڭگە دايىندىعىن قامتاماسىز ەتۋگە مۇمكىندىك بەرەدى. 50-دەن استام ۋچاسكەدە جۇمىستار جۇرگىزىلمەك.
ەسكە سالا كەتەيىك، ءبىر ايدان از ۋاقىت بۇرىن بەكتەنوۆ كەنتاۋ، ريددەر جانە قىزىلوردا قالالارىنىڭ جىلۋ كوزدەرىن رەكونسترۋكتسيالاۋعا قاراجات ءبولۋ تۋرالى قاۋلىلارعا قول قويعان بولاتىن. اتاپ ايتقاندا، ريددەر جىلۋ ەلەكتر ورتالىعىنىڭ تەحنولوگيالىق جابدىقتارى مەن ينفراقۇرىلىمىنا كۇردەلى جوندەۋ جۇمىستارىن جۇرگىزۋگە 4,9 ملرد تەڭگە ءبولىندى.
جالپى العاندا، جىلۋمەن جابدىقتاۋ جۇيەسىن جاڭعىرتۋ جۇمىستارى اياسىندا استانا، الماتى، شىمكەنت، اتىراۋ، وسكەمەن، قاراعاندى، اقتاۋ، تاراز، پەتروپاۆل، پاۆلودار، جەزقازعان، اقتوبە، ەكىباستۇز، ستەپنوگورسك، رۋدنىي، بالقاش جانە اقسۋ قالالارىندا 10 ەنەرگيا بلوگىن، 55 قازاندىقتى جانە 45 تۋربينانى جوندەۋ جوسپارلانىپ وتىر.
رەسپۋبليكانىڭ جىلۋ كوزدەرى مەن جىلۋ جەلىلەرىن كەشەندى تۇردە جاڭعىرتۋ ماسەلەسى ۇكىمەتتىڭ تۇراقتى باقىلاۋىندا.
