“ادىرنا” ۇلتتىق پورتالىندا “اقتوبەلىكتەر قاڭعىباس يت-مىسىقتاردى اۋلاۋعا 29 ميلليون تەڭگە جۇمساماق” دەگەن تاقىرىپپەن ماقالا جاريالاعان بولاتىن. اقتوبە وبلىسىنىڭ ۆەتەريناريا باسقارماسى بۇل دەرەكتى جوققا شىعارىپ، قالا اۋماعىنداعى يت-مىسىقتاردى اۋلاۋ ءۇشىن بيىل بيۋدجەتتەن 29 ميلليون تەڭگە ەمەس، 80 ميلليون تەڭگە بولىنگەنىن “مالىمدەدى”، دەپ حابارلايدى ادىرنا ۇلتتىق پورتالى.
“اقتوبەلىكتەر قاڭعىباس يت-مىسىقتاردى اۋلاۋعا 29 ميلليون تەڭگە جۇمساماق” اتتى ماقالادا ءبىز مەملەكەتتىك بيۋدجەتتەن بولىنگەن 29 ميلليوننان اسا قارجىعا تەندەر جەڭىمپازى 2024 جىلدىڭ 31 جەلتوقسانىنا دەيىن اقتوبە قالاسىنىڭ الماتى جانە استانا اۋداندارىنان كەمىندە قاراۋسىز قالعان قاڭعىباس 8 000 يت پەن 5 000 مىسىقتى اۋلاپ، ۋاقىتشا ۇستاۋ پۋنكىنە جەتكىزۋى ءتيىس ەكەنىن، ءبىر قاڭعىباس ءۇي جانۋارىن ۇستاۋ شامامەن 2230 تەڭگەنى قۇرايتىنىن، جاڭا جىلعا دەيىنگى بار بولعانى بەس اي ۋاقىتتا اقتوبە قالاسىنىڭ الماتى مەن استانا اتتى ەكى-اق اۋدانىنان 8 000 يت، 5 000 مىسىقتى اۋلاۋدىڭ مۇمكىن ەمەستىگىن جازعانبىز. اقتوبە وبلىسىنىڭ ۆەتەريناريا باسقارماسىنا كوكەيدەگى سۇراقتاردى قويىپ، رەسمي حات تا جولداعانبىز.
ول رەسمي حاتقا تومەندەگىدەي جاۋاپ كەلىپتى (حات ءماتىنىنىڭ ءبىر ءارپىن دە وزگەرتپەي نازارلارىڭىزعا ۇسىنامىز). حاتتا:
“2024 جىلعا اقتوبە قالاسى بويىنشا قاڭعىباس جانۋارلاردى اۋلاۋ، ۋاقىتشا ۇستاۋ، بىردەيلەندىرۋ، ستەريلدەۋ جۇمىستارىنا 65 368 378 تەڭگە قارجى ءبولىندى. (ونىڭ ىشىندە اۋلاۋ جۇمىسىنا 36 362 768 تەڭگە، كۇتىپ باعۋعا 23 160 960 تەڭگە، بىردەيلەندىرۋگە 1 752 400 تەڭگە، ستەريليزاتسيالاۋ جۇمىستارىنا 4 092 250 تەڭگە). جوسپارعا سايكەس 10 050 قاڭعىباس يت جانە 350 قاڭعىباس مىسىقتاردى اۋلاۋ قاراستىرىلعان، الايدا 2024 جىلدىڭ ءبىرىنشى جارتى جىلدىعىندا تۇسكەن ارىز شاعىمدارمەن سۋ تاسقىنى جاعدايلارىنا بايلانىستى قاڭعىباس جانۋارلاردى اۋلاۋعا ارنالعان جىلدىق جوسپار ورىندالدى. جىلدىق جوسپاردىڭ ورىندالۋىنا بايلانىستى، اقتوبە قالاسىنىڭ «استانا» جانە «الماتى» اۋداندارى اكىمدەرىنىڭ سۇرانىس حاتتارىنا سايكەس 2024 جىلدىڭ ەكىنشى جارتى جىلدىعىنا 8000 باس قاڭعىباس يت جانە 500 باس قاڭعىباس مىسىقتى اۋلاۋعا 29 719 570 تەڭگە قاراستىرىلدى” دەلىنگەن.
رەسمي حاتتا كورسەتىلگەندەي اقتوبە وبلىسىنىڭ ۆەتەريناريا باسقارماسى اقتوبە قالاسىنداعى قاڭعىباس يتتەر مەن مىسىقتاردى اۋلاۋ ءۇشىن 2024 جىلعا ارناپ 65 ميلليون تەڭگەدەن استام قارجى ءبولىپ، ول قارجىنى العاشقى جارتى جىلدىقتا يگەرىپ تاستاعان. 65 362 768 تەڭگەگە 10 050 يت پەن 3500 (نەگە ەكەنى بەلگىسىز باسقارما رەسمي حاتتا 350 مىسىق دەپ كورسەتكەن) مىسىقتى اۋلاپ، قولدارىنان كەلگەنىنشە جابايى جانۋارلاردىڭ بارلىق جاعدايىن جاساعان. ارتىنشا اقىلداسىپ العانداي 1-2 شىلدە كۇندەرى اقتوبەدەگى “استانا” مەن “الماتى” اۋداندارىنىڭ اكىمدىكتەرى وبلىستىق ۆەتەريناريا باسقارماسىنا سۋ تاسقىنىنا بايلانىستى اۋدانداردىڭ اۋماعىندا قاڭعىباس ءۇي جانۋارلارىنىڭ كوبەيىپ كەتكەنى تۋرالى حات جازىپ، باسقارما ارادا ونشاقتى كۇن وتپەي جاتىپ 29 ميلليون تەڭگەگە تەندەر جاريالاعان.
ول تەندەردى “اكتوبە فەنيكس 2030" جشس كومپانياسى 13 ميلليون تەڭگەگە ارزانداتىپ، جارتى باعاسىنا، بار بولعانى 15 ميلليون تەڭگەگە ۇتىپ الىپتى. ەندى، اتالعان كومپانيا 15 ميلليون تەڭگەگە 8 000 باس قاڭعىباس يت، 5 000 باس مىسىق اۋلايدى.
وسى جەردە مىنا ءبىر لوگيكالىق قاراما-قايشىلىققا قاراڭىزشى. رەسمي حاتتا اقتوبە وبلىستىق ۆەتەريناريا باسقارماسى اقتوبە قالاسى اۋماعىنداعى قاڭعىباس يت-مىسىقتاردىڭ جاعدايىنا ارناپ ءبىر جىلعا بولگەن 65 362 768 تەڭگەنىڭ 36 362 768 تەڭگەسى 10 050 يت، 3 500 مىسىق (جالپى سانى 13 550) اۋلاۋعا جۇمسالعانى انىق كورسەتىلىپ تۇر. ال، ءبىز وسى ماسەلەنى كوتەرگەننەن كەيىن تەندەردى ۇتىپ العان “اكتوبە فەنيكس 2030” كومپانياسى 15 000 000 تەڭگەگە 8 000 يت، 5 000 مىسىق (13 000) اۋلاماق. ياعني، ۆەتەريناريا باسقارماسى العاشقى جارتى جىلدىقتا 36 ميلليون تەڭگەدەن استام قارجىعا 13 550 يت-مىسىق اۋلاسا، قالعان جارتى جىلدا ىشىندە 15 ميلليون تەڭگەگە 13 000 يت-مىسىق اۋلاماق. ياعني، 13 000 باس يت مىسىقتى 15 ميلليون تەڭگەگە اۋلاۋ مۇمكىن بولسا، باسقارما العاشقى جارتى جىلدىقتا ءدال وسىنداي اۋقىمداعى جۇمىسقا نەگە 36 ميلليون تەڭگەدەن استام قارجى شىعىنداعان؟
وبلىستىق ۆەتەريناريا باسقارماسى ءبىر جىلعا ارنالعان 65 362 768 تەڭگەنى العاشقى جارتى جىلدىقتا يگەرىپ تاستاپ، بيۋدجەتتەن تاعى 15 ميلليون تەڭگە بولگىزىپ، جالپى سوماسى 80 362 768 تەڭگەگە ءبىر جىل ىشىندە 26 550 جابايى يت-مىسىق اۋلاپ، ءۇي جانۋارلارىنىڭ جاعدايىن جاساپ وتىر دەگەنگە حالىقتى بىلاي قويىپ، ۆەتەريناريا باسقارماسىنىڭ ءوزى سەنە مە ەكەن؟ حالىق سانى 500 مىڭعا جەتپەيتىن قالادا 26 550 قاڭعىباس يت-مىسىق بولۋى (قانشا سۋ تاسقىنى بولسا دا) مۇمكىن بە؟
بۇل سۇراقتاردى ءتيىستى مەكەمەگە جانە جولدادىق. ولاردان جەتكەن جاۋاپتى الداعى ۋاقىتتا جاريالايتىن بولامىز.
اقان بىرلىك
"ادىرنا" ۇلتتىق پورتالى
