ادىرنا ۇلتتىق پورتالىندا «ۇلى وتان سوعىسى. مامىردا اتالۋى ءتيىس – جەلتوقسانعا جىلجىعان نە شارا؟» اتاۋىمەن ماتەريال جاريالاعان بولاتىن. اقتوبە وبلىسىنىڭ مادەنيەت، ارحيۆتەر جانە قۇجاتتاما باسقارماسى بيىل 9 مامىردا ءوتۋى ءتيىس جەڭىس مەرەكەسىن جەلتوقسان ايىندا تويلاعانىن مويىندادى، - دەپ حابارلايدى ادىرنا ۇلتتىق پورتالى.
ادىرنا پورتالى 6 قاراشا كۇنى اقتوبە وبلىسىنىڭ مادەنيەت، ارحيۆتەر جانە قۇجاتتاما باسقارماسى «اقتوبە وبلىسىنىڭ ىزدەستىرۋ جاساعىنىڭ پاتريوتتىق تاربيەنى قالىپتاستىرۋعا باعىتتالعان ۇلى وتان سوعىسى تاريحى بويىنشا ءىس-شارالار وتكىزۋ» دەگەن تاقىرىپپەن تەندەر جاريالاعانىن، اتاۋىنىڭ ءوزى تۇسىنىكسىز ءھام كۇڭگىرت شارانى وتكىزۋگە وبلىس بيۋدجەتىنەن 1 ملن 339 مىڭ 285 تەڭگە قارجى بولىنگەنىن، تەندەر جەڭىمپازى 26 قاراشا كۇنى انىقتالعانىن جازعان ەدى.
سونداي-اق، پورتال تىلشىلەرى مادەنيەت باسقارماسىنا:
«1. اقتوبە وبلىسى جەلتوقسان وقيعاسى قۇرباندارىن ەسكە الاتىن جانە تاۋەلسىزدىك كۇنى تويلاناتىن ايدا جەڭىس مەيرامىن اتاپ وتپەك پە؟
2. اقتوبە وبلىسىنىڭ مادەنيەت باسقارماسى ۇلى وتان سوعىسى اتاۋىن بەتپەردە ەتىپ، دۇرىس باعىتتا جۇمسالماي قالعان قارجىنى جىل اياعىنا دەيىن يگەرىپ ۇلگەرمۋدى كوزدەپ وتىرعان جوق پا؟» دەگەن ەكى ساۋال جولداعان بولاتىن.
اتالعان ساۋالدارعا اقتوبە وبلىسىنىڭ مادەنيەت، ارحيۆتەر جانە قۇجاتتاما باسقارماسىنىڭ باسشىسى ا.يۋنيسوۆا تومەندەگىدەي جاۋاپ بەرگەن:
قازاقستان رەسپۋبليكاسىنىڭ 2005 جىلعى 12 ساۋىردەگى N 36 «قازاقستان رەسپۋبليكاسىنداعى مەملەكەتتىك الەۋمەتتىك تاپسىرىس، ستراتەگيالىق ارىپتەستىكتى ىسكە اسىرۋعا ارنالعان مەملەكەتتىك تاپسىرىس، ۇكىمەتتىك ەمەس ۇيىمدارعا ارنالعان گرانتتار جانە سىيلىقاقىلار تۋرالى» زاڭىنىڭ 5-بابى 12 تارماقشاسىنا سايكەس اقتوبە وبلىسىنىڭ ارحيۆتەر جانە قۇجاتتاما مادەنيەت باسقارماسىمەن مەملەكەتتىك الەۋمەتتىك تاپسىرىس اياسىندا 2023 جىلعا «اقتوبە وبلىسىنىڭ ىزدەستىرۋ جاساعىنىڭ پاتريوتتىق تاربيەنى قالىپتاستىرۋعا باعىتتالعان ۇوس تاريحى بويىنشا ءىس-شارالار وتكىزۋ» تاقىرىبىمەن حابارلاندىرۋ 2023 جىلعى 14 اقپاندا جاريالانعان بولاتىن.
العاشقى لوت بويىنشا وتىنىمدەر تۇسپەۋىنە جانە كونكۋرسقا قاتىسۋعا ءبىر الەۋەتتى ءونىم بەرۋشىنىڭ جىبەرىلۋىنە بايلانىستى جىلدىڭ باسىنان بەرى حابارلاندىرۋلار 5 رەت بەرىلدى. سول سەبەپتى، جىل بويى كونكۋرسقا تالاپقا سايكەس ءوتىنىم تۇسپەگەندىكتەن، اتالعان شارانىڭ كونكۋرس ناتيجەسى بويىنشا ءۇ.ستىمىزدەگى جىلدىڭ قاراشا ايىندا ۇيىمداستىرۋشى ۇكىمەتتىك ەمەس ۇيىم انىقتالىپ، شارانى وتكىزۋ جەلتوقسان ايىنا بەلگىلەندى.
سونىمەن قاتار، جەلتوقسان ايىندا تاۋەلسىزدىك كۇنى، جەلتوقسان قۇرباندارىن ەسكە الۋ شارالارى وبلىستىڭ مادەنيەت جانە ونەر مەكەمەلەرىندە جوسپارلانىپ ۇدايى تۇردە وتكىزىلىپ تۇراتىندىعىن قاپەرىڭىزگە سالامىز» دەلىنگەن.
9 مامىر – جەڭىس كۇنى مەرەكەسىن تويلاۋعا ارنالعان تەندەرى وتپەي قالسا، ول مەرەكەنى جەلتوقسان ايىندا تويلاۋ كەرەك پە؟ يگەرىلمەگەن قارجىنى باسقا ماقساتقا پايدالانۋعا بولماس پا ەدى؟
قانات بىرلىكۇلى
ادىرنا ۇلتتىق پورتالى
