Premer-Ministrı Oljas Bektenov Ridderdegı jūmystardy küşeitu üşın Ükımet rezervınen qosymşa qarajat bölu turaly qaulyǧa qol qoidy. Būl turaly ükımettıŋ baspasöz qyzmetı mälımdedı, dep habarlaidy “Adyrna” ūlttyq portaly.
Memleket basşysy Qasym-Jomart Toqaevtyŋ tapsyrmasy boiynşa Ükımet elımızdıŋ jylumen jabdyqtau jüiesın keşendı türde jaŋǧyrtu jūmystaryn jürgızıp jatyr.Mälımet boiynşa, Ridderdıŋ jylu jelılerıne byltyr jürgızılgen jöndeu-qalpyna keltıru jūmystary olardyŋ tozu deŋgeiın 78,8%-ǧa deiın tömendetuge mümkındık berdı. Alaida, būl tūrǧyndardy jylumen üzdıksız qamtamasyz etu üşın älı de jetkılıksız. Jalpy alǧanda, ötken jylytu mausymynda jylu jelılerınde 25 tehnologiialyq būzuşylyq faktısı tırkeldı, sonyŋ saldarynan tūtynuşylar üşın şekteuler engızıldı.
Keiınge qaldyruǧa bolmaityn qajettı şūǧyl jūmystardy eskere otyryp, QR Ükımetı rezervınen Ridder qalasynyŋ "Vodokanal" jylu jelılerın kürdelı jöndeuge 2,4 mlrd teŋgeden astam qarajat böldı. Būl olardyŋ tozu deŋgeiın jaramdy körsetkışterge deiın jetkızuge jäne qysqy kezeŋge daiyndyǧyn qamtamasyz etuge mümkındık beredı. 50-den astam uchaskede jūmystar jürgızılmek.
Eske sala keteiık, bır aidan az uaqyt būryn Bektenov Kentau, Ridder jäne Qyzylorda qalalarynyŋ jylu közderın rekonstruksiialauǧa qarajat bölu turaly qaulylarǧa qol qoiǧan bolatyn. Atap aitqanda, Ridder jylu elektr ortalyǧynyŋ tehnologiialyq jabdyqtary men infraqūrylymyna kürdelı jöndeu jūmystaryn jürgızuge 4,9 mlrd teŋge bölındı.
Jalpy alǧanda, jylumen jabdyqtau jüiesın jaŋǧyrtu jūmystary aiasynda Astana, Almaty, Şymkent, Atyrau, Öskemen, Qaraǧandy, Aqtau, Taraz, Petropavl, Pavlodar, Jezqazǧan, Aqtöbe, Ekıbastūz, Stepnogorsk, Rudnyi, Balqaş jäne Aqsu qalalarynda 10 energiia blogyn, 55 qazandyqty jäne 45 turbinany jöndeu josparlanyp otyr.
Respublikanyŋ jylu közderı men jylu jelılerın keşendı türde jaŋǧyrtu mäselesı ükımettıŋ tūraqty baqylauynda.
