وزبەكستاننىڭ رەسەيدەگى ەلشىسى بوتيرجون اسادوۆ رەسەي سىرتقى ىستەر مينيسترلىگىنە شاقىرىلدى. وعان جۋرناليستيكا جانە بۇقارالىق كوممۋنيكاتسيالار ۋنيۆەرسيتەتىنىڭ رەكتورى شەرزودحان قۇدراتحودجاەۆتىڭ مالىمدەمەسىنە بايلانىستى نارازىلىق ءبىلدىرىلدى، دەپ حابارلايدى «ادىرنا» ءتىلشىسى.
بۇعان دەيىن جوو باسشىسى وزبەكستاندا تۇرىپ جاتقان، بىراق وزبەك ءتىلىن بىلمەيتىن ادامداردى «اقىماق نەمەسە باسقىنشى» دەپ اتاعان ەدى. ول 1966 جىلى كەڭەس وداعىنىڭ ءبىر بولىگى بولعان وزبەكستانعا رەسەي، بەلارۋس جانە ۋكراينادان كوپتەگەن تۇتقىننىڭ كەلگەنىن اتاپ ءوتتى.
«ولار جەر سىلكىنىسىنەن كەيىن تاشكەنتتى قالپىنا كەلتىرۋگە كومەكتەسۋى ءتيىس ەدى. بۇل جۇمىسشىلاردىڭ باسىم بولىگى وزبەكستاندا قالدى، الايدا مەملەكەتتىك ءتىلدى ۇيرەنگەن جوق»،—دەدى ول.
رەسەي سىرتقى ىستەر مينيسترلىگىنىڭ ايتۋىنشا، مۇنداي سوزدەردىڭ مازمۇنى مەن رەڭى ەكى ەلدى بايلانىستىراتىن تەرەڭ ستراتەگيالىق سەرىكتەستىك پەن وداقتىق قاتىناستارىنا مۇلدەم قايشى كەلەدى.
«كسرو قۇرامىندا بولعان وزبەكستان ءوندىرىسى مەن اۋىل شارۋاشىلىعىن، عىلىمى مەن مادەنيەتىن قارقىندى دامىتا الدى. بۇگىندە وزبەكستان تاۋەلسىز مەملەكەت رەتىندە رەسەيمەن ءوزارا تەڭ دارەجەدە، ءوزارا قۇرمەتكە نەگىزدەلگەن قاتىناس ورناتتى. سوندىقتان ءبىز شەرزودحان قۇدراتحودجاەۆتىڭ ءسوزىن وزبەكستان حالقى قولدامايدى جانە ول ءسوز وزبەكستاندىقتاردىڭ جالپى كوڭىل كۇيىن بىلدىرمەيدى دەپ سەنەمىز»، - دەپ ءتۇسىندىردى رەسەي ءسىم.
