ماسكەۋدەگى پرەسنەن سوتى بلوگەرلەر رامير حاسانوۆ، ايدىن ءتۇسىپوۆ، ەرسىن دۇمشەبايدى 3 جىل 6 اي مەرزىمىنە باس بوستاندىعىنان ايىرۋ تۋرالى شەشىم قابىلدادى، دەپ حابارلايدى “ادىرنا” ۇلتتىق پورتالى.
“سوت شەشىمىمەن ايىپتالۋشىلار 3 جىل 6 اي مەرزىمىنە باس بوستاندىعىنان ايىرىلدى جانە سوت زالىندا قاماۋعا الىندى", - دەلىنگەن ماسكەۋ پروكۋراتۋراسىنىڭ حابارلاماسىندا.
Stan.kz سايتىنىڭ مالىمەتىنشە، وقيعا ناۋرىز ايىندا بولعان. ءۇش بلوگەر پرەسنەن جاعالاۋىنا بيزنەس-كلاسىنداعى تاكسي شاقىرىپ، پرانك جاساماقشى بولعان. BMW جۇرگىزۋشىسى جولاۋشىلاردىڭ وتىنىشىمەن زاتتاردى جۇكسالعىشقا سالىپ جاتقاندا، بلوگەرلەردىڭ بىرەۋى رولگە وتىرىپ، كولىكتى ۇرلاپ كەتكەن. ولار مۇنىڭ بارلىعىن ۆيدەوعا ءتۇسىرىپ العان.
كەيىنىرەك كىنالىلەر جۇرگىزۋشىگە كەلىپ، جاعدايدى تۇسىندىرگەن. الايدا پوليتسيادا كولىك ۇرلاۋ بابىمەن قىلمىستىق ءىس قوزعالىپ، جاس جىگىتتەر قاماۋعا الىنعان ەدى.
“ادىرنا” ۇلتتىق پورتالى
