قوعامدىق ورىنداردا بەتتى جاۋىپ تۇراتىن كيىم كيگەندەرگە جازا قولدانىلادى. بۇگىن، 3 جەلتوقساندا ءماجىلىس «قۇقىقبۇزۋشىلىق پروفيلاكتيكاسى تۋرالى» جاڭا زاڭدى ەكىنشى وقىلىمدا قابىلدادى، دەپ حابارلايدى «ادىرنا» ءتىلشىسى.
«زاڭدا قۇقىقبۇزۋشىلىق پروفيلاكتيكاسى جۇيەسى كەڭەيتىلىپ، پروفيلاكتيكا سۋبەكتىلەرىنىڭ سانى 13-تەن 26-عا دەيىن ارتادى. وعان وتباسىن قولداۋ ورتالىقتارى، ءموبيلدى توپتار، قامقورشىلىق ورگاندارى، باق، جاستار ءىسى جونىندەگى ورتالىقتار، ۋاكىلەتتى ورگاندار جانە كاسىپكەرلەر كىرەدى. سونىمەن قاتار پروفيلاكتيكا مودەلىنىڭ ءوزى قايتا قارالادى. ەندى وعان جالپى، جەكە جانە ارنايى شارالار ەنگىزىلەدى»،-دەلىنگەن حابارلامادا.
اكىمشىلىك قۇقىقبۇزۋشىلىق تۋرالى كودەكسكە ەنگىزىلگەن تۇزەتۋلەردە قوعامدىق ورىنداردا بەتتى جاۋىپ تۇراتىن، تانۋعا كەدەرگى كەلتىرەتىن كيىم (نيقاب) كيگەنى ءۇشىن اكىمشىلىك جازا قاراستىرىلعان. قۇقىقبۇزۋشىلىق ءۇشىن ءبىرىنشى رەت ەسكەرتۋ جاسالادى، قايتالانعان جاعدايدا 10 اەك ( شامامەن 43 مىڭ تەڭگە - رەد.) كولەمىندە ايىپپۇل سالىنادى.
زاڭعا قايشى كونتەنتتى جاريالاعاندار مەن تاراتقاندارعا، سونداي-اق مەملەكەتتىك ورگانداردىڭ بۇزۋشىلىقتاردىڭ سەبەبىن جويۋ تۋرالى نۇسقاۋلارىن قاساقانا ورىنداماعاندارعا قاتىستى جاۋاپكەرشىلىك ەنگىزىلەدى.
