تۇركىستان وبلىسى تولەبي اۋدانى زاعامبار اۋىلىندا ءجاسوسپىرىم قىز زورلاندى. وبلىستىق پوليتسيا دەپارتامەنتى وقيعادان ەكى كۇن وتكەن سوڭ مالىمدەمە جاسادى، دەپ حابارلايدى «ادىرنا» ءتىلشىسى.
«24 ساۋىردە كامەلەتكە تولماعاندى زورلاۋ فاكتىسى بويىنشا قىلمىستىق ءىس قوزعالدى. كامەلەتكە تولماعان كۇدىكتى ۇستالىپ، قاماۋعا الىندى. ساراپتاما تاعايىندالدى جانە قىلمىستىق ءىس سوتقا جولدانادى.
سونىمەن قاتار 25 ساۋىردە پوليتسياعا بوتەننىڭ مۇلكىن ورتەۋ تۋرالى حابارلامالار ءتۇستى. اتالعان فاكتىلەر بويىنشا قىلمىستىق ىستەر قوزعالدى. زارداپ شەككەندەر مەن قۇرباندار جوق.
بوتەننىڭ مۇلكىن ورتەۋ فاكتىسىنە قاتىسقانداردىڭ بارلىعى انىقتالىپ، ۇستالدى جانە قاماۋعا الىندى. تەرگەۋ جالعاسۋدا»،—دەلىنگەن 26 ءساۋىر كۇنى تاراتىلعان حابارلامادا.
قۇزىرلى ورگان قازىرگى ۋاقىتتا زاعامبار اۋىلىندا جاعداي تۇراقتى ەكەنىن مالىمدەدى.
«وبلىس اكىمى جانە بارلىق مەملەكەتتىك ورگان باسشىلارىنىڭ توراعالىعىمەن اۋىل تۇرعىندارىنا جيىن وتكىزىلىپ، ءتيىستى ءتۇسىندىرۋ جۇمىستارى جۇرگىزىلدى، زاڭ شەڭبەرىندە شەشىم قابىلداناتىنى ەسكەرتىلدى»،—دەدى پد-نىڭ ءباسپاسوز قىزمەتى.
پوليتسيا دەپارتامەنتى ينتەرنەت جەلىسىندە تارالعان "بىرنەشە وقۋشى ۇستالدى، جابىرلەنۋشى جۇكتى جانە بىرقاتار جىگىتتەر زورلادى" دەگەن اقپاراتتاردىڭ شىندىققا جاناسپايتىنىن ايتتى.
«قازىرگى تاڭدا جالعان اقپارات تاراتقان بىرقاتار اۆتورلار انىقتالدى، ولارعا قاتىستى اكىمشىلىك جانە قىلمىستىق شارالار قابىلدانۋدا. بارشا ازاماتقا رەسمي اقپارات كوزدەرىنەن الىنعان اقپاراتقا سەنۋ قاجەتتىگىن، جالعان اقپارات تاراتقانى ءۇشىن جاۋاپكەرشىلىك قاراستىرىلعانىن ەسكەرتەمىن»،—دەپ پىكىر ءبىلدىردى تۇركىستان وبلىستىق پوليتسيا دەپارتامەنتىنىڭ باستىعى مۇرات قابدەنوۆ.
