الماتى وبلىسىندا پىشاق جاراقاتىن العان 24 جاستاعى جىگىت كوز جۇمدى، دەپ حابارلايدى “ادىرنا” ۇلتتىق پورتالى.
قايعىلى وقيعا تالعار اۋدانىنا قاراستى نۇرا اۋىلىندا بولعان.
وقيعا تۋرالى جۋرناليست نۇرتاي لاحان جازعان.
جازباعا سايكەس، مارقۇم ىنىسىمەن بىرگە تۇندە اكەسىنىڭ قابىرىنە بارىپ، قۇران وقىپ قايتىپ كەلە جاتقان. جولدا ولار كولىكتىڭ بارلىق ەسىگىن اشىپ، جولدى بوگەپ تۇرعان ءۇش جىگىتكە تاپ بولعان. مارقۇم ءوتۋ ءۇشىن كولىك ەسىكتەرىن جابۋدى سۇراعانىمەن، قارىمتا جاۋاپ رەتىندە دورەكىلىككە تاپ بولعان.
كۋاگەرلەردىڭ سوزىنشە، ەر ادام جانجال شىعارماي، ۇيىنە قايتىپ كەلگەن. الايدا ارتىنان ەرگەن كۇدىكتىلەردىڭ ءبىرى ونى ەكى رەت پىشاقتاپ، وكپەسىنە اۋىر جاراقات سالعان. كۇدىكتى 20 جاستاعى اۋىل تۇرعىنى ەكەنى ايتىلدى.
الماتى وبلىستىق پوليتسيا دەپارتامەنتى 24 جاستاعى نۇرا اۋىلى تۇرعىنىنىڭ 11 مامىر كۇنى اۋرۋحانادا العان جاراقاتتارىنان كوز جۇمعانىن راستادى.
پوليتسيانىڭ مالىمەتىنشە، وقيعا تۋرالى حابار تۇسكەننەن كەيىن بارلىق سىرتقى قىزمەتتەر جۇمىلدىرىلىپ، بلوكبەكەتتەر قويىلعان. جەدەل-ىزدەستىرۋ شارالارى بارىسىندا كۇدىكتى رەتىندە مارقۇمنىڭ ءۇش اۋىلداسى ۇستالدى.
اتالعان فاكتى بويىنشا «ادام ءولتىرۋ» جانە «بۇزاقىلىق» باپتارى بويىنشا قىلمىستىق ءىس قوزعالدى. كۇدىكتىلەر ۋاقىتشا ۇستاۋ يزولياتورىنا قامالدى.
بەلگىلى بولعانداي، مارقۇمنىڭ ارتىندا ەكى قىزى قالعان. كىشى قىزى جۋىردا عانا ءبىر جاسقا تولعان.
