رەسەيلىك بەلگىلى ءانشى السۋ «گولوس.دەتي» بايقاۋىنىڭ قاتىسۋشىلارىنان كەشىرىم سۇراپ، قىزى ونەر كورسەتكەن شوۋدا داۋىس ساتىپ العانىن مويىندادى، دەپ حابارلايدى «ادىرنا» ءتىلشىسى.
«مەن كوپشىلىكتەن كەشىرىم سۇراعىم كەلەدى. بارلىعىمىز بالالارىمىزدى جاقسى كورەمىز جانە ولارعا قولىمىزدان كەلگەنشە كومەكتەسكىمىز كەلەدى. مەن دۇرىس ەمەس ارەكەت جاسادىم. سوندىقتان قىزىم ميكەللادان جانە باسقالاردان كەشىرىم سۇرايمىن»، - دەدى ونەر يەسى ناتاليا پودولسكايانىڭ YouTube ارناسىنا بەرگەن سۇحباتىندا.
ەسكە سالايىق، وسىدان 5 جىل بۇرىن، 2019 جىلى السۋدىڭ قىزى ميكەللا ابراموۆا «گولوس.دەتي» شوۋىنىڭ جەڭىمپازدى اتانعان ەدى. ول كورەرمەن داۋسىنىڭ ارقاسىندا قازاق ءانشىسى ەرجان ماكسيمنەن باسىم ءتۇستى. ال وتانداسىمىز ەكىنشى ورىنعا تابان تىرەدى. فينالدا ول ديماش قۇدايبەرگەن ايتىپ جۇرگەن «All by Myself» ءانىن ورىنداپ، كورەرمەندەردى ءتانتى ەتتى.
