Reseılik belgili ánshi Alsý «Golos.Detı» baıqaýynyń qatysýshylarynan keshirim surap, qyzy óner kórsetken shoýda daýys satyp alǵanyn moıyndady, dep habarlaıdy «Adyrna» tilshisi.
«Men kópshilikten keshirim suraǵym keledi. Barlyǵymyz balalarymyzdy jaqsy kóremiz jáne olarǵa qolymyzdan kelgenshe kómekteskimiz keledi. Men durys emes áreket jasadym. Sondyqtan qyzym Mıkelladan jáne basqalardan keshirim suraımyn», - dedi óner ıesi Natalıa Podolskaıanyń YouTube arnasyna bergen suhbatynda.
Eske salaıyq, osydan 5 jyl buryn, 2019 jyly Alsýdyń qyzy Mıkella Abramova «Golos.Detı» shoýynyń jeńimpazdy atanǵan edi. Ol kórermen daýsynyń arqasynda qazaq ánshisi Erjan Maksımnen basym tústi. Al otandasymyz ekinshi orynǵa taban tiredi. Fınalda ol Dımash Qudaıbergen aıtyp júrgen «All by Myself» ánin oryndap, kórermenderdi tánti etti.
