سەۋل كيەۆتى سولتۇستىك كورەيانىڭ ەكى اسكەري تۇتقىنىنىڭ وڭتۇستىك كورەياعا تاپسىرىلعانى تۋرالى اقپاراتتى جاريا ەتتى جانە بۇل قادامنىڭ قۇپيا ساقتالۋى جونىندەگى كەلىسىم بولعانىن كەيىن جوققا شىعاردى دەپ ايىپتاپ وتىر. وسىعان بايلانىستى وڭتۇستىك كورەيا پرەزيدەنتى اكىمشىلىگى ۋكراينادان رەسمي تۇسىنىكتەمە مەن كەشىرىم سۇراۋدى تالاپ ەتتى، دەپ حابارلايدى «ادىرنا» ءتىلشىسى.
«پرەزيدەنت اكىمشىلىگى ۋكراينانىڭ اقپاراتتى بىرجاقتى تۇردە جاريالاۋىنا جانە كەيىن قۇپيالىلىق تۋرالى كەلىسىم بولماعانى جونىندە جالعان مالىمدەمە جاساۋىنا بايلانىستى تەرەڭ وكىنىش بىلدىرەدى»، – دەلىنگەن پرەزيدەنتتىڭ قوعاممەن بايلانىس جونىندەگى اعا حاتشىسى سون گي حوننىڭ جەكسەنبى كۇنى جاريالانعان مالىمدەمەسىندە.
ول قاجەت بولعان جاعدايدا ۇكىمەتتىڭ وسى جاعدايعا بايلانىستى قوسىمشا شارالار قابىلداۋ مۇمكىندىگىن قاراستىرىپ جاتقانىن ايتتى.
سون گي حوننىڭ سوزىنشە، كيەۆ تۇتقىنداردى بەرۋ ماسەلەسىن سەۋلمەن بىرنەشە ارنا ارقىلى بىرنەشە رەت تالقىلاپ، بۇل اقپاراتتىڭ قۇپيا ساقتالۋىن تالاپ ەتكەن. ۋكراينا تاراپى مۇنى سولتۇستىككورەيالىق ساربازداردى ۋكراينالىق اسكەري تۇتقىندارعا ايىرباستاۋ مۇمكىندىگىن جىبەرىپ العانى ءۇشىن ەل ىشىندە سىن تۋى ىقتيمال ەكەنىمەن تۇسىندىرگەن.
وڭتۇستىك كورەيا قاۋىپسىزدىك، ديپلوماتيالىق جانە گۋمانيتارلىق سەبەپتەردى، سونىڭ ىشىندە تۇتقىندار مەن ولاردىڭ وتباسىلارىنىڭ قاۋىپسىزدىگىن ەسكەرە وتىرىپ، بۇل اقپاراتتى قۇپيا ساقتاۋعا كەلىسكەن.
مالىمدەمەگە سايكەس، ۋكراينا پرەزيدەنتى ۆلاديمير زەلەنسكي بۇۇ باس اسسامبلەياسىندا سويلەگەن سوزىندە تۇتقىنداردىڭ تاپسىرىلعانى تۋرالى اقپاراتتى الدىن الا جەتكىلىكتى دەڭگەيدە كەلىسسوز جۇرگىزبەستەن جاريالاعان. كەيىن كيەۆ قۇپيالىلىق تۋرالى قانداي دا ءبىر كەلىسىمنىڭ بولعانىن جوققا شىعارعان.
سەۋل بۇل جاعداي ەكى ەل ۇكىمەتى اراسىنداعى سەنىمگە ەلەۋلى نۇقسان كەلتىرىپ، ەكىجاقتى قارىم-قاتىناسقا كەرى اسەر ەتۋى مۇمكىن ەكەنىن ەسكەرتكەن.
ەسكە سالساق، ۆلاديمير زەلەنسكي سارسەنبى كۇنى نيۋ-يوركتە وتكەن بۇۇ باس اسسامبلەياسىندا ۋكراينا جۋىردا كۋرسك وبلىسىندا تۇتقىنعا تۇسكەن سولتۇستىك كورەيانىڭ ەكى ساربازىن وڭتۇستىك كورەياعا تاپسىرعانىن مالىمدەگەن. بۇل ساربازداردىڭ تۇتقىنعا تۇسكەنى تۋرالى زەلەنسكي العاش رەت 2025 جىلدىڭ قاڭتارىندا حابارلاعان بولاتىن.
