قۇجاتسىز مالعا 3 ادام كۋالىك قىلماق. بۇل تۋرالى اۋىل شارۋاشىلىعى سالاسىنداعى جەكە جانە زاڭدى تۇلعالارعا تابيعي سيپاتتاعى توتەنشە جاعداي سالدارىنان كەلتىرىلگەن زالالدى وتەۋ قاعيدالارىندا جاريالاندى، دەپ حابارلايدى “ادىرنا” ۇلتتىق پورتالى.
قۇجاتقا سايكەس، تابيعي سيپاتتاعى توتەنشە جاعداي جاريالانعان كەزدە جەرگىلىكتى دەڭگەيدەگى كوميسسيا قۇرىلادى. وعان جەرگىلىكتى اكىمدىكتەردىڭ ىشكى ىستەر ورگاندارىنىڭ (كەلىسىم بويىنشا), قوعامدىق ۇيىمداردىڭ، «اتامەكەن» وڭىرلىك كاسىپكەرلەر پالاتالارىنىڭ جانە جەرگىلىكتى قوعامداستىق وكىلدەرى كىرەدى.
مالى تابيعي توتەنشە جاعداي سالدارىنان قىرىلدى دەپ ەسەپتەيتىن تۇرعىندار وسى كوميسسياعا ءتيىستى ءوتىنىشتى توتەنشە جاعداي رەجيمى جاريالانعاننان باستاپ 30 كۇننىڭ ىشىندە وتكىزۋى كەرەك.
مال يەلەرىنە شىعىن بيۋدجەتتەن دە، بيۋدجەتتەن تىس كوزدەردەن دە وتەلۋى مۇمكىن. بيۋدجەتتەن تىس كوزدەردىڭ اقشاسى ەشبىر قۇجاتى جوق مالدىڭ شىعىنىن وتەۋگە باعىتتالادى.
مالعا وتەماقى تاعايىنداۋ ءۇشىن كوميسسيا مىنا جايتتارعا كوز جەتكىزۋ كەرەك:
- ولگەن مالدىڭ سايكەستەندىرۋ بەلگىلەرى بار ەكەنىنە (قۇلاق بەلگىسى، تاۆرو، ميكروچيپ);
- ولگەن مالدىڭ سايكەستەندىرۋ بەلگىلەرى جوق بولسا، اۋىل شارۋاشىلىعى جانۋارلارىن بىردەيلەندىرۋ بازاسىندا تىركەلگەنىنە;
- ولەكسەسى تابىلماعان مالدىڭ اۋىل شارۋاشىلىعى جانۋارلارىن بىردەيلەندىرۋ بازاسىندا تىركەلگەنىنە.
«ولگەن مالدىڭ يەسىنىڭ اۋىزشا ايتۋى بويىنشا تيەسىلىگىن انىقتاۋ قاجەت بولعان جاعدايدا كەمىندە 3 كۋاگەردى تارتا وتىرىپ، اۋىل شارۋاشىلىعى جانۋارىنىڭ ءولىمىنىڭ كوميسسيالىق اكتىسىن جاساۋ جانە كادەگە جاراتۋ اياقتالعاننان كەيىن اكت جاساۋ قاجەت. كوميسسيا، شارۋاشىلىق ساناتىنا قاراماستان قۇس باسى بويىنشا زالالدى وتەۋدى ءتيىستى كادەگە جاراتۋ اكتىلەرىنىڭ قورىتىندىلارى بويىنشا جۇزەگە اسىرادى»، - دەلىنگەن قۇجاتتا.
دەمەك، مالدىڭ ەشبىر قۇجاتى بولماسا، ەشبىر بازادا تىركەلمەگەن جانە ولەكسەسى تابىلماعان بولسا، ءۇش كۋاگەردى تارتا وتىرىپ اكت تولتىرىلادى.
وتەماقى مولشەرى ولگەن مالدىڭ جاسى مەن جىنىسىنا قاراي ۇلتتىق ستاتيستيكا بيۋروسى جاريالايتىن نارىقتىق قۇنى بويىنشا ايقىندالادى.
