Qujatsyz malǵa 3 adam kýálik qylmaq. Bul týraly aýyl sharýashylyǵy salasyndaǵy jeke jáne zańdy tulǵalarǵa tabıǵı sıpattaǵy tótenshe jaǵdaı saldarynan keltirilgen zalaldy óteý qaǵıdalarynda jarııalandy, dep habarlaıdy “Adyrna” ulttyq portaly.
Qujatqa sáıkes, tabıǵı sıpattaǵy tótenshe jaǵdaı jarııalanǵan kezde jergilikti deńgeıdegi komıssııa qurylady. Oǵan jergilikti ákimdikterdiń ishki ister organdarynyń (kelisim boıynsha), qoǵamdyq uıymdardyń, «Atameken» óńirlik kásipkerler palatalarynyń jáne jergilikti qoǵamdastyq ókilderi kiredi.
Maly tabıǵı tótenshe jaǵdaı saldarynan qyryldy dep esepteıtin turǵyndar osy komıssııaǵa tıisti ótinishti tótenshe jaǵdaı rejımi jarııalanǵannan bastap 30 kúnniń ishinde ótkizýi kerek.
Mal ıelerine shyǵyn bıýdjetten de, bıýdjetten tys kózderden de ótelýi múmkin. Bıýdjetten tys kózderdiń aqshasy eshbir qujaty joq maldyń shyǵynyn óteýge baǵyttalady.
Malǵa ótemaqy taǵaıyndaý úshin komıssııa myna jaıttarǵa kóz jetkizý kerek:
- ólgen maldyń sáıkestendirý belgileri bar ekenine (qulaq belgisi, tavro, mıkrochıp);
- ólgen maldyń sáıkestendirý belgileri joq bolsa, aýyl sharýashylyǵy janýarlaryn birdeılendirý bazasynda tirkelgenine;
- óleksesi tabylmaǵan maldyń aýyl sharýashylyǵy janýarlaryn birdeılendirý bazasynda tirkelgenine.
«Ólgen maldyń ıesiniń aýyzsha aıtýy boıynsha tıesiligin anyqtaý qajet bolǵan jaǵdaıda keminde 3 kýágerdi tarta otyryp, aýyl sharýashylyǵy janýarynyń óliminiń komıssııalyq aktisin jasaý jáne kádege jaratý aıaqtalǵannan keıin akt jasaý qajet. Komıssııa, sharýashylyq sanatyna qaramastan qus basy boıynsha zalaldy óteýdi tıisti kádege jaratý aktileriniń qorytyndylary boıynsha júzege asyrady», - delingen qujatta.
Demek, maldyń eshbir qujaty bolmasa, eshbir bazada tirkelmegen jáne óleksesi tabylmaǵan bolsa, úsh kýágerdi tarta otyryp akt toltyrylady.
Ótemaqy mólsheri ólgen maldyń jasy men jynysyna qaraı Ulttyq statıstıka bıýrosy jarııalaıtyn naryqtyq quny boıynsha aıqyndalady.
