ىشكى ىستەر مينيسترلىگى قازاقستاندىقتاردىڭ تولقۇجاتىندا نەگە ەلەكترون چيپ جۇرگەنىن ءتۇسىندىردى

2479
Adyrna.kz Telegram

Instagram جەلىسىندە چيپتەلگەن تولقۇجاتتىڭ ۆيدەوسى تاراعان ەدى. سوعان بايلانىستى كوشى-قون قىزمەتى تۇسىنىك بەردى، دەپ حابارلايدى "ادىرنا" ۇلتتىق پورتالى.

"ەلەكترون تولقۇجات الەمنىڭ كوپ ەلىندە ەنگىزىلگەن. قازاقستاندا ميكروسحەماسى بار تولقۇجاتتار، سونداي-اق جەكە كۋالىكتەر 2009 جىلدان باستاپ شىعارىلادى. چيپ ادام تۋرالى جەكە دەرەكتەردى ساقتاۋعا ارنالادى جانە جەكە تۇلعانى سايكەستەندىرۋگە مۇمكىندىك بەرەدى", - دەدى مينيسترلىكتىڭ ءباسپاسوز قىزمەتىندەگىلەر.

ىشكى ىستەر مينيسترلىگى ءچيپى بار تولقۇجات ەلەكترودتى جۇيەلەر ارقىلى باسقا ەلدەردەگى شەكارا وتكىزۋ پۋنكتتەرىنەن جانە پاسپورتتىق-ۆيزالىق باقىلاۋدان جەڭىل ءوتۋ ءۇشىن ەنگىزىلگەنىن ايتتى.

"تولقۇجاتتارداعى چيپتەر شەكارادان وتكەن كەزدە تەك ارنايى وقۋ قۇرىلعىلارىمەن ءوزارا ارەكەتتەسەدى", - دەپ تولىقتىردى دەپارتامەنت وكىلدەرى.

ەسكە سالايىق، قازنەت قولدانۋشىلارى چيپتەلگەن تولقۇجاتتى تالقىلاعان بولاتىن. ۆيدەو كەيىپكەرلەرى تولقۇجاتتى اشىپ، ىشىنەن چيپكە ۇقساس قۇرىلعىنى تابادى. اۆتورلار بۇل ميكروسحەما شەتەلدە جۇرگەن قازاقستاندىقتاردى باقىلاۋعا ارنالعانىن ايتادى.

"ادىرنا" ۇلتتىق پورتالى

پىكىرلەر