قر پرەمەر-ءمينيسترى ولجاس بەكتەنوۆ اپتا سوڭىنا دەيىن سۋ تاسقىنىنان زارداپ شەككەندەرگە وتەماقى تولەۋدى تاپسىردى، دەپ حابارلايدى “ادىرنا” ۇلتتىق پورتالى ۇكىمەتتىڭ ءباسپاسوز قىزمەتىنە سىلتەپ.
«قر پرەمەر-ءمينيسترى ولجاس بەكتەنوۆ سۋ تاسقىنىنان زارداپ شەككەن ازاماتتارعا كەلتىرىلگەن شىعىندى وتەۋ ماسەلەسى بويىنشا كەڭەس وتكىزدى. بۇگىنگى كۇنى زارداپ شەككەن 3561 وتباسىنا 100 اەك كولەمىندە جوعالعان مۇلكى ءۇشىن بىرجولعى وتەماقى تۇرىندە شامامەن 1 ملرد تەڭگە تولەندى. وسى اپتانىڭ سوڭىنا دەيىن بارلىق زارداپ شەككەندەرگە وتەماقى تولەنەدى»، - دەلىنگەن سارسەنبى كۇنى تاراتقان حابارلامادا.
باسپاناسىنان ايىرىلعان تۇرعىندار ءۇشىن زارداپ شەگۋشىنىڭ ءوز تاڭداۋى بويىنشا جاڭا ۇيلەر سالىنادى نەمەسە نارىقتان دايىن باسپانا ساتىپ الىنادى. ساياجاي بويىنشا، ەگەر ولار زارداپ شەككەن ادامنىڭ جالعىز ءۇيى بولسا، وسىنداي تەتىك قولدانىلاتىن بولادى.
كەڭەستە سۋ تاسقىنى سالدارىنان زارداپ شەككەن وڭىرلەردىڭ اكىمدەرى كەلتىرىلگەن زالالدى وتەۋ بويىنشا جۇرگىزىلىپ جاتقان جۇمىستاردىڭ اعىمداعى ناتيجەلەرى تۋرالى باياندادى. ماسەلەن، پاۆلودار وبلىسىندا دەمەيشىلەرمەن بىرگە 119 ءۇي بويىنشا زالال وتەلىپ، تۇرۋعا جارامسىز 5 ءۇيدىڭ قۇرىلىسى باستالدى. قوستاناي وبلىسىندا زارداپ شەككەندەر ءۇشىن ارقالىق قالاسىنان 27 پاتەر ساتىپ الىندى، 1 600 وتباسىنا الەۋمەتتىك كومەك تولەندى. اقتوبە وبلىسىندا 44 وتباسىنا 94,3 ملن تەڭگە كولەمىندە ماتەريالدىق شىعىن وتەلدى; 57 جاڭا ءۇيدىڭ قۇرىلىسى باستالدى.
اكىمدىكتەردىڭ جەدەل دەرەكتەرى بويىنشا بۇگىندە زارداپ شەككەن ۇيلەر سانى – 9 627, ونىڭ ىشىندە:
- 9610 جەكە;
- 17 كوپپاتەرلى تۇرعىن ءۇي.
ۇقساس جاڭالىقتار
