بۇگىن، 12 ءساۋىر الماتى قالالىق سوتىندا عالىمجان جاقيانوۆتىڭ تولەن توقتاسىنوۆقا قاتىستى تالاپ ارىزى بويىنشا اپەللياتسيالىق سوتى ءوتتى. ازاماتتىق ىستەر جونىندەگى القا الماتى قالاسى مەدەۋ اۋداندىق سوتىنىڭ شەشىمىن وزگەرىسسىز قالدىردى. ياعني، عالىمجان جاقيانوۆتىڭ ارىزىن قاناعاتتاندىرمادى، دەپ حابارلايدى “ادىرنا” ۇلتتىق پورتالى.
ەسكە سالايىق، بىلتىر الماتى قالاسى مەدەۋ اۋداندىق سوتىنا پاۆلودار وبلىسىنىڭ ەكس-اكىمى عالىمجان جاقيانوۆ ەكس-دەپۋتات تولەن توقتاسىنوۆ پەن ونىڭ جۇبايى الما توقتاسىنوۆاعا قاتىستى، ياعني ورتاق كاسىپتەگى ۇلەسىنە جارتىلاي تولەم رەتىندە ءوز ەركىمەن تولەگەن اقشانى ءوندىرۋ تۋرالى تالاپ ارىز تاستاعان بولاتىن.
ياعني، عالىمجان جاقيانوۆ بيزنەس سەرىكتەسىنەن ALGT موڭعول كومپانياسىنداعى ۇلەسى ءۇشىن 462 مىڭ دوللاردى قايتارۋدى تالاپ ەتكەن. ول تولەمنىڭ 25%-ىن عانا تولەگەن. جاقيانوۆتىڭ ايتۋىنشا، توقتاسىنوۆ ونى ساتىلىپ جاتقان ۇلەسكە يەلىك ەتپەگەندىكتەن اداستىرعان كورىنەدى.
سوت جارتى جىلعا سوزىپ، قورىتىندىسى 16 قاڭتار كۇنى جاريالاندى. ناتيجەسىندە تولەن توقتاسىنوۆ جەڭىسكە جەتتى.
الايدا، سوت شەشىمىنە قاناعاتتانباعان جاقيانوۆ الماتى قالالىق سوتىنا ارىزدانىپ، اپەللياتسياعا بەرگەن بولاتىن.
دەگەنمەن، بۇگىنگى سوت ءبىرىنشى ينستانتسياداعى سوتتىڭ شەشىمىن وزشگەرىسسىز قالدىرا وتىرىپ، جاقيانوۆتىڭ سەرىكتەستىكتەگى بارلىق ىستەردەن حاباردار بولعانىن ايتتى. الايدا ودان الدىن جاقيانوۆ سەرىكتەستىكتەگى شارۋادان حابارسىزبىن دەگەن.
«ن.يساەۆا توراعالىق ەتەتىن الماتى قالالىق سوتىنىڭ قۇرامىنا زاڭدى جانە ءادىل شەشىم قابىلداۋدا ادامگەرشىلىك پەن وبەكتيۆتىلىك تانىتقاندارى ءۇشىن العىس ايتامىز!» - دەگەن الما توقتاسىنوۆا قارسىلاستارى تۋرالى اشىنا سويلەدى.
ايتا كەتەيىك، تولەن توقتاسىنوۆ سوت پروتسەسىنە قاتىسا المادى. قازىر جاعدايى ناشارلاپ، اۋرۋحانادا ەم الۋدا. بۇل تۋرالى كاسىپكەر، ءارى ەكى تاراپتىڭ دوسى احمەتبەك نۇرسيلا Facebook پاراقشاسىندا جازعان ەدى.
«تولەن توقتاسىنوۆ دوسىم اۋىر ناۋقاسقا ۇشىرىپ قالدى. عالىمجان جاقيانوۆ پەن تاگير سيسەنباەۆ دەگەن جاسى ۇلكەن ادامدارعا "وكپەگە قيسا دا، ولىمگە قيمايتىن قازاقتىڭ بالاسى ەدىك، تاعدىرى قىل ۇستىندە تۇرعان، وسى جاعدايعا وزدەرىڭ جەتكىزگەن اتپال ازاماتتى ءوز قولدارىڭمەن ولتىرگىلەرىڭ كەلمەسە توقتاتىڭدارشى" دەپ ولەردەگى ءسوزىمدى ايتىپ بىرنەشە حات جازدىم.
عالىمجان دا، تولەن دە دوسىم. بىراق "پلاتون مەنىڭ دوسىم، بىراق مەن ءۇشىن اقيقات قىمبات" دەپ سوكرات ايتقانداي مەن اقيقات جاعىنا شىقتىم. «ەلدەستىرمەك ەلشىدەن» دەپ وسى ۇرىستى توقتاتۋعا بار كۇشىمدى سالدىم، باسۋ ايتتىم، بىراق بولماي جاتىر، وكىنىشكە قاراي”، دەپ جازدى احمەتبەك نۇرسيلا.
ايتا كەتەيىك، بۇعان دەيىن “دوستار داۋى” اراسىنداعى تارتىستىڭ قالاي باستالعانى جانە سوت بارىسىن بىرنەشە رەت جازعان بولاتىنبىز.
