قاراعاندى وبلىسىندا، بۇكىل قازاقستانداعىداي، قالالار مەن اۋدانداردىڭ كوشەلەرى، گۇلزارلارى جانە ساياباقتارى تازارتىلۋدا. بۇگىن "تازا قازاقستان" اكتسياسى اياسىندا "تازا بەيسەنبى" وتۋدە.
ەلدى مەكەندەردىڭ كوشەلەرىنە مەملەكەتتىك قىزمەتكەرلەر، بيزنەس وكىلدەرى، تۇرعىندار مەن ەرىكتىلەر شىقتى. اكتسياعا مىڭنان استام ۇيىمدار مەن كاسىپورىندار قوسىلدى. ولار قوقىستاردى جينايدى، اۋماقتاردى كوركەيتەدى.
اتاپ ايتقاندا، قاراعاندىنى جيناۋ ءۇشىن قالا سەكتورلار بويىنشا ءبولىندى. كۇن سايىن 5 مىڭ تەكشە مەتردەن استام قوقىس پەن قاتتى قالدىقتار شىعارىلادى.
بۇگىن قاراعاندى اكىمدىگىنىڭ، قازىبەك بي جانە ءاليحان بوكەيحان اۋداندارىنىڭ بەلسەندىلەرى مەن قىزمەتكەرلەرى حالىق تىعىز قونىستانعان اۋماقتاردى تازارتپاقشى.
بۇل وڭتۇستىك-شىعىستاعى تۇرعىن ءۇي كەشەندەرىنىڭ اينالاسىنداعى اۋلا الاڭدارى، ۆوستوك-1, 2, 3 شاعىن اۋداندارى. 7 مىڭ تەكشە مەتردەن استام قوقىس پەن قتق شىعارۋ جوسپارلانۋدا.
كوكپەكتى اۋىلىنىڭ ەكوبەلسەندىلەرى قاراعاندى – قارقارالى تاس جولىنىڭ بويىندا سەنبىلىك وتكىزدى.
ء“بىز كوكپەكتى اۋىلدىق وكرۋگىنىڭ قوعام قايراتكەرلەرىمىز. ءۇشىنشى كۇن قاتارىنان قاراعاندى – قارقارالى تاس جولىنىڭ بويىن قوقىستان تازارتىپ جاتىرمىز. اۋدانىمىزدىڭ باسقا تۇرعىندارىن دا وسى شاراعا قوسىلۋعا شاقىرامىز!" – دەپ بەلسەندىلەر جەرلەستەرىنە جۇگىنەدى.
اكتسيانى بالقاشتىقتار دا قولدادى. وندا سانيتارلىق تازارتۋ بويىنشا اۋقىمدى چەللەندج ىسكە قوسىلدى. بۇل شاراعا قوعامنىڭ ءارتۇرلى توپتارى: ستۋدەنتتەر، ەرىكتىلەر، كاسىپكەرلەر، كوپقاباتتى ۇيلەردىڭ تۇرعىندارى، پوليتسيا قىزمەتكەرلەرى مەن كوممۋنالدىق قىزمەتتەر قولداۋ كورسەتتى.
بايسەيىتوۆا كوشەسىندەگى № 3 ءۇيدىڭ تۇرعىندارى ءوز اۋلالارىندا سەنبىلىك ۇيىمداستىردى. اۋلا اۋماعىن بىرگە تازارتىپ، اعاشتار مەن قورشاۋلاردى اكتەدى، جولداردى سىپىردى، قوقىستاردى جينادى.
ازاماتتاردان قوقىس تاستاماۋدى جانە تازالىق پەن ءتارتىپتى ساقتاۋدى سۇرايمىز. سونداي-اق، بارشاڭىزدى ءۇي ماڭىنداعى اۋماقتاردى تازالاۋعا ۇلەس قوسۋعا جانە قالانى بىرلەسكەن كۇش-جىگەرمەن جايلى، قاۋىپسىز جانە تازا ەتۋگە شاقىرامىز", – دەپ قالا تازالىعىنا بەي-جاي قارامايتىن بەلسەندىلەر قالا تۇرعىندارىن سەنبىلىككە شىعۋعا شاقىردى.
بۇگىنگى تاڭدا قالادا 3000-عا جۋىق قوقىس جينالدى.
سونداي-اق، اعاشتاردى سانيتارلىق كەسۋ، قالانىڭ سىرتقى كەلبەتىن رەتكە كەلتىرۋ جانە كوگالداندىرۋ ۇيىمداستىرىلدى.
"تازا قازاقستان" ەكولوگيالىق اكتسياسى بەس اپتاعا سوزىلادى.
