قازاقستاننىڭ جامبىل وبلىسىمەن شەكتەسەتىن قىرعىزستاننىڭ كيروۆ سۋ قويماسى 81%-عا تولدى، دەپ حابارلايدى "ادىرنا" ءتىلشىسى قازاقپاراتقا سىلتەپ.
قازىر بارلىق سۋ قويمالارىنىڭ جۇمىسى مەن تولتىرىلۋىنا تاۋلىك بويى مونيتورينگ جۇرگىزىلۋدە.
وبلىستىق توتەنشە جاعدايلار دەپارتامەنتى باسشىسىنىڭ ورىنباسارى رۋسلان ورىنبەكوۆ وڭىردە 141 گيدروتەحنيكالىق قۇرىلىس نىسانى بارىن، ونىڭ ىشىندە 18-ءى رەسپۋبليكالىق مەنشىكتە، 115-ءى كوممۋنالدىق مەنشىكتە جانە سەگىزى جەكە مەنشىكتە ەكەنىن ايتتى.
«شەكاراداعى كيروۆ سۋ قويماسىنان سۋدىڭ اعۋى كۇن سايىن باقىلانادى. قىرعىز رەسپۋبليكاسىنىڭ مالىمەتى بويىنشا، بۇل ءىرى سۋ قويماسىنان سۋ مامىر ايىندا شىعارىلادى دەپ كۇتىلۋدە. بارلىق سۋ قويمالارىنىڭ جالپى تولتىرىلۋى بۇگىندە 77 پايىزدى قۇرايدى. كيروۆ سۋ قويماسى 81%، ءىرى تاسوتكەل سۋ قويماسى 94%، جارتاس 90%، بۇركىتتى 47%، اقكول 25% تولعان. تەرىسكەيدە اششىبۇلاق قويماسى – 97%، ىنتالى سۋ قويماسى – 97%، قاراقوڭىر سۋ قويماسى – 99% جانە قاقپاتاس – 99% تولدى دەپ اتاۋعا بولادى. سۋ قويمالارىن پايدالانۋ كەستەسى جاسالىپ، سۋ تاسقىنىنا قارسى تۇرۋ بويىنشا تاۋلىك بويى كەزەكشىلىك ۇيىمداستىرىلدى", - دەپ ءمالىم ەتتى ول.
