مەملەكەت باسشىسى قاسىم-جومارت توقاەۆ وزبەكستان رەسپۋبليكاسىنىڭ پرەزيدەنتى شاۆكات ميرزيەەۆپەن تەلەفون ارقىلى سويلەستى، - دەپ حابارلايدى adyrna.kz اقوردا سايتىنا سىلتەمە جاساپ.
اڭگىمەلەسۋ بارىسىندا قازاقستان پرەزيدەنتى سىرداريا وبلىسىنداعى ساردوبا سۋ قويماسى بوگەتىنىڭ بۇزىلۋ سالدارىن جويۋ جونىندەگى وزبەكستاننىڭ قولعا العان ءىس-قيمىلدارىن جوعارى باعالاپ، باۋىرلاس ءارى تاتۋ كورشى وزبەك حالقىنا كومەك كورسەتۋگە دايىن ەكەنىن جەتكىزدى.
شاۆكات ميرزيوەۆ قاسىم-جومارت توقاەۆقا قولداۋ بىلدىرگەنى ءۇشىن العىس ايتىپ، اتالعان اپات قازاقستاننىڭ وڭتۇستىگىندەگى بىرقاتار ەلدى مەكەنگە دە زيان تيگىزگەنىنە وكىنىش ءبىلدىردى. وسىعان وراي وزبەكستان پرەزيدەنتى سۋ تاسقىنىنان زارداپ شەككەن اۋدانداردى تەزىرەك قايتا قالپىنا كەلتىرۋ ماقساتىندا بىرلەسكەن شارالار قابىلداۋعا نيەتتى ەكەنىن ايتتى.
مەملەكەتتەر باسشىلارى قالىپتاسقان جاعدايعا وراي تۋىنداعان بارلىق ماسەلەنى شۇعىل شەشۋ ءۇشىن ەكى ەلدىڭ ۇكىمەتتەرى دەڭگەيىندەگى ۇيلەسىمدى جۇمىستىڭ ماڭىزدىلىعىن اتاپ ءوتتى. سونىمەن قاتار تاراپتار COVID-19 ۆيرۋسىنا قارسى كۇرەستە ەكى ەلدىڭ اتقارىپ جاتقان ءتيىمدى ءارى جۇيەلى جۇمىستارىنا كوڭىلدەرى تولاتىنىن ايتىپ، سونىڭ ارقاسىندا ىندەتتىڭ كەڭ تارالۋىنا جول بەرىلمەگەنىنە توقتالدى.
وسى رەتتە تاراپتار پاندەميانىڭ قازاقستان مەن وزبەكستان اراسىنداعى ساۋدا-ەكونوميكالىق قاتىناستارعا كەرى اسەرىن بولدىرماۋ ماقساتىندا ەكىجاقتى ىقپالداستىقتى جانداندىرۋ قاجەتتىگىنە نازار اۋداردى. اتاپ ايتقاندا اۋىل شارۋاشىلىعى، ماشينا جاساۋ، جەڭىل ونەركاسىپ جانە تاعى باسقا سالالارداعى ەكسپورت الەۋەتىن ارتتىرۋ ءۇشىن بىرلەسكەن ءوندىرىس ورىندارىن اشۋ تۋرالى ۋاعدالاستىققا قول جەتكىزىلدى.
قازاقستان تاراپىنىڭ باستاماسىمەن بولعان اڭگىمەلەسۋ جىلى جانە دوستىق راۋىشتە ءوتتى.
كەشە ماقتاارال اۋدانىنىڭ ەكى اۋىلىن سۋ باسقانىن, ال بۇگىن سۋ تاسقىنىنىڭ اتالعان اۋدانداعى ورگەباس ەلدىمەكەنىنە جەتكەنىن حابارلاعان بولاتىنبىز.
