ورازا ايت قارساڭىندا كورشىلەس وزبەكستان پرەزيدەنتى جازاسىن وتەپ جاتقاندارعا راقىمشىلىق جاساعان، دەپ حابارلايدى "ادىرنا" ءتىلشىسى قازاقپاراتقا سىلتەپ.
پرەزيدەنت شاۆكات ميرزيوەۆ «جازاسىن وتەپ جاتقان، ىستەگەن ىسىنە وكىنەتىن جانە ءومىرىن وزگەرتۋگە بەت العان ادامدار توبىنا راقىمشىلىق جاساۋ» جارلىعىنا قول قويدى. ول جارلىققا ساي 426 ادامعا راقىمشىلىق جاساعان.
426 ادامنىڭ ىشىندە 135 سوتتالعان نەگىزگى جازاسىن وتەۋدەن تولىق بوساتىلسا، ال 200 ادام مەرزىمىنەن بۇرىن شارتتى تۇردە بوستاندىققا شىقپاق. 26 ادامنىڭ جازاسى جەڭىلدەتىلىپ، باس بوستاندىعىنان ايىرىلعان 65 ازاماتتىڭ مەرزىمدەرى قىسقاردى.
«راقىمشىلىق جاسالعانداردىڭ قاتارىندا شەت مەملەكەتتەردىڭ 11 ازاماتى، 50 ايەل، 60 جاستان اسقان 13 ەر ادام، 30 جاسقا دەيىنگى 157 ادام (ونىڭ ىشىندە ۇشەۋى كامەلەتكە تولماعاندار), سونداي-اق تىيىم سالىنعان ۇيىمداردىڭ قىزمەتىنە قاتىسقان 5 ادام بار»، - دەدى وزبەكستان باسشىسىنىڭ ءباسپاسوز قىزمەتى.
ەسكە سالا كەتەيىك، تۇرىكمەنستاندا سوتتالعاندار ءۇشىن قادىر تۇنىنە وراي امنيستيا جاريالانعان بولاتىن.
29 ناۋرىزدا تۇركىمەنستان پرەزيدەنتى سەردار بەردىمۇحامەدوۆ ۇكىمەتتىڭ الەۋمەتتىك-ەكونوميكالىق دامۋ ماسەلەلەرىنە ارنالعان وتىرىسىندا ءداستۇر بويىنشا قاسيەتتى «گادير گيدجەسي» ءتۇنى، ياعني قادىر ءتۇنى قۇرمەتىنە، بۇرىن سوتتالعان 356 ازاماتقا راقىمشىلىق جاساۋ تۋرالى جارلىققا قول قويدى.
