رەسەي سىرتقى ىستەر ءمينيسترى سەرگەي لاۆروۆ سامارقانداعى «قايعى جامىلعان انا» مەموريالىنا بارعان ساتىندە وندا تەك وزبەك جانە اعىلشىن تىلدەرىندە جازۋ جازىلعانىنا نازار اۋدارىپ، ارىپتەسىنە “ەسكەرتۋ” جاسادى، دەپ حابارلايدى “ادىرنا” ۇلتتىق پورتالى.
لاۆروۆ بۇل جايتتى وزبەكستاننىڭ سىرتقى ىستەر ءمينيسترى باحتيور سايدوۆقا ايتىپ ءوتتى.
“قاراسام، اعىلشىنشا جازۋ تۇر. ال ورىسشاسى كورىنبەيدى. انا – ەڭ قاسيەتتى ۇعىم”، – دەدى لاۆروۆ تاسس اگەنتتىگى كەلتىرگەن سوزىندە.
ءسوز بولىپ وتىرعان جازۋ: "You are always in our heart, my dear", ياعني «سەن ءاردايىم جۇرەگىمىزدەسىڭ، قىمباتتىم» دەگەن ماعىنا بەرەدى.
سەرگەي لاۆروۆ وزبەكستاندا ەكى كۇندىك ساپارمەن ءجۇر.
بۇعان دەيىن رەسەي سىرتقى ساياسي ۆەدومستۆوسى باسشىسىنىڭ ءوزىن-ءوزى انىقتاۋ قۇقىعىنا قاتىستى ايتقان مالىمدەمەسى ۇلكەن قوعامدىق رەزونانس تۋدىرعان بولاتىن. كەيبىر ساراپشىلار بۇل ءسوزدى سولتۇستىك قازاقستانعا جاسالعان استارلى مەڭزەۋ رەتىندە قابىلداعان.
