ايەلىن قاتىگەزدىكپەن ءولتىردى دەپ ايىپتالعان ەكس-مينيستر قۋاندىق بيشىمباەۆتىڭ كەزەكتى سوتى بۇگىن، 8 ساۋىردە ودان ءارى جالعاستى. سوت بارىسىندا بيشىمباەۆتىڭ ادۆوكاتتارى سالتانات نۇكەنوۆانىڭ كۇيەۋىنە ۋادە بەرگەن قولحاتىن وقىپ، ونى ىسكە دالەل رەتىندە قوسپاق بولدى، دەپ حابارلايدى “ادىرنا” ۇلتتىق پورتالى.
سوت بارىسىندا ادۆوكاتتار بيشىمباەۆتىڭ قويىن داپتەرىندە مارقۇم سالتاناتتىڭ ءتىرى كەزىندە جازعان قولحاتى بارىن مالىمدەدى.
“مەن، سالتانات نۇكەنوۆا، ەندى قۋاندىققا سەنۋگە، ونى قىزعانباۋعا، ءوز-وزىممەن جۇمىس ىستەپ، كۇيەۋىمدى سىيلاۋعا، پسيحولوگقا تۇراقتى تۇردە بارۋعا، سۇيىكتى، ساليقالى جار بولۋعا، قۋاندىققا مويىنسۇنۋعا، بوقتىق سوزدەردى ايتپاۋعا، اشۋلانباۋعا، تۇسىنىستىكپەن قاراپ، تىنىشتىقتى ساقتاۋعا ۋادە بەرەمىن. مەنىڭ كۇدىكتەرىم اقتالعان جوق جانە شىندىقتى بىلۋگە مۇمكىن بەرگەنىنە، ماعان ماڭىزدى نارسەنى ۇسىنعانىنا راحمەت. مەن كۇيەۋىمدى دە، ءوزىمدى دە قينامايمىن، ماحابباتىمىزعا قۇرمەتپەن، ساقتىقپەن قاراپ، جۇبايىممەن بىرگە ناماز وقيمىن، سانالى بولۋعا ۇمتىلىپ، ءۇيدىڭ بەرەكەسىن ساقتايمىن. وسىنداي كۇيەۋدى بەرگەن اللاعا سانسىز شۇكىر”، – دەلىنگەن ادۆوكات وقىعان قولحاتتا.
ايتۋلارىنشا، وسى كەزدە سالتانات قىزعانىپ، حات-حابارلاردى قاعازعا شىعارىپ اكەلۋدى سۇراعان. بيشىمباەۆ سونى ۇسىنعاننان سوڭ ول وسىنداي قولحات جازعان. وسى بلوكنوتتاعى حات ارقىلى ادۆوكاتتار “قيناۋ” بابىن جوققا شىعارماق بولدى.
الايدا سۋديا مۇنى دالەل رەتىندە قولدانۋ جونىندە ارىزدى قابىلدامادى.
ەسكە سالايىق، بۇرىنعى ۇلتتىق ەكونوميكا ءمينيسترى قۋاندىق بيشىمباەۆ ايەلى سالتانات نۇكەنوۆانى ءولتىردى دەگەن كۇدىكپەن ۇستالعان بولاتىن. كەيىننەن قىلمىستى جاسىردى دەگەن ايىپپەن سالتانات نۇكەنوۆا كوز جۇمعان مەيرامحانانىڭ ديرەكتورى دا تۇتقىندالدى. بۇدان بولەك ەكس-مينيستر قۋاندىق بيشىمباەۆقا قىلمىستىق كودەكستىڭ 110-بابى 2-بولىگى ("ازاپتاۋ"), قىلمىستىق كودەكستىڭ 99-بابى 2-بولىگى 5-تارماعى ("اسا قاتىگەزدىكپەن ادام ءولتىرۋ") بويىنشا جاڭا ايىپتار تاعىلعان ەدى. ال ونىڭ تۋىسى باقىتجان بايجانوۆ – قىلمىستى جاسىرعانى جانە حابارلاماعانى ءۇشىن ايىپتالعان ەدى.
