استانادا بلوگەر ەربولات ءجانابىلوۆتىڭ جۇبايى ەلميرا تولەگەنوۆانىڭ ءىسى بويىنشا سوت پروتسەسى باستالدى، دەپ حابارلايدى "ادىرنا" ۇلتتىق پورتالى.
ول ادۆوكاتتارىمەن بىرگە سوتقا كەلدى.
وتىرىس ەلوردانىڭ مامانداندىرىلعان اۋدانارالىق اكىمشىلىك قۇقىقبۇزۋشىلىقتار جونىندەگى سوتىندا ءوتىپ جاتىر.
سوتقا بلوگەر ەلميرا تولەگەنوۆانىڭ ءوزى دە، سونداي-اق ەرلى-زايىپتى ادۆوكاتتار ولەگ پەن اننا چەرنوۆتار كەلدى.
ەسكە سالا كەتەيىك، 5 قىركۇيەكتە وسى سوتتا بلوگەر ەربولات ءجانابىلوۆتىڭ ءىسى قارالعان بولاتىن. سول پروتسەستە جۇبايىنان سوت زالىن بوساتۋدى سۇراعان. كەيىن ەلميرا تولەگەنوۆانى قايتا شاقىرعانىمەن، ول كۋالىك بەرۋدەن باس تارتقان.
سوت بارىسىندا بلوگەر ەربولات ءجانابىلوۆتىڭ ادۆوكاتى ولەگ چەرنوۆ پروكۋروردى سوتقا تارتۋ تۋرالى ءوتىنىش ءبىلدىرىپ، ءوز قورعاۋىنداعى ازاماتتىڭ قۇقىعى بۇزىلعانىن مالىمدەدى. وسىعان بايلانىستى سوت وتىرىسى 15 قىركۇيەككە شەگەرىلگەن ەدى.
ايتا كەتەيىك، ەربولات ءجانابىلوۆ پەن ەلميرا تولەگەنوۆا — قازاقستانداعى ەڭ تانىمال بلوگەرلەردىڭ قاتارىندا. ەربولاتتىڭ پاراقشاسىنا 8,4 ميلليون ادام، ال ەلميرانىڭ اككاۋنتىنا 7,1 ميلليون ادام جازىلعان.
18–21 تامىز كۇندەرى بلوگەرلەر ەربولات ءجانابىلوۆ پەن ەلميرا تولەگەنوۆا كولىك ۇتىس ويىنىن جاريالادى. الايدا تىكەلەي ەفيردى كۇتكەن قولدانۋشىلارعا 30 مىڭ تەڭگە تولەۋ قاجەت بولاتىن اقىلى وقۋ كۋرسىنا سىلتەمە ۇسىنىلعان. ۇتىسقا قاتىسۋ تەك وسى كۋرستى ساتىپ العاننان كەيىن عانا مۇمكىن بولعان. بۇل جاعداي قوعامدا سىنعا ۇشىراپ، مەملەكەتتىك ورگاندارعا شاعىم ءتۇستى.
تۋريزم جانە سپورت مينيسترلىگى ۇتىس ويىندارىن ۇيىمداستىرۋعا جانە بيلەتتەرىن تاراتۋعا تەك رەسمي لوتەرەيا وپەراتورلارى مەن اگەنتتەرىنىڭ عانا قۇقىعى بار ەكەنىن ەسكە سالدى.
