Áıelin qatigezdikpen óltirdi dep aıyptalǵan eks-mınıstr Qýandyq Bıshimbaevtyń kezekti soty búgin, 8 sáýirde odan ári jalǵasty. Sot barysynda Bıshimbaevtyń advokattary Saltanat Núkenovanyń kúıeýine ýáde bergen qolhatyn oqyp, ony iske dálel retinde qospaq boldy, dep habarlaıdy “Adyrna” ulttyq portaly.
Sot barysynda advokattar Bıshimbaevtyń qoıyn dápterinde marqum Saltanattyń tiri kezinde jazǵan qolhaty baryn málimdedi.
“Men, Saltanat Núkenova, endi Qýandyqqa senýge, ony qyzǵanbaýǵa, óz-ózimmen jumys istep, kúıeýimdi syılaýǵa, psıhologqa turaqty túrde barýǵa, súıikti, salıqaly jar bolýǵa, Qýandyqqa moıynsunýǵa, boqtyq sózderdi aıtpaýǵa, ashýlanbaýǵa, túsinistikpen qarap, tynyshtyqty saqtaýǵa ýáde beremin. Meniń kúdikterim aqtalǵan joq jáne shyndyqty bilýge múmkin bergenine, maǵan mańyzdy nárseni usynǵanyna rahmet. Men kúıeýimdi de, ózimdi de qınamaımyn, mahabbatymyzǵa qurmetpen, saqtyqpen qarap, jubaıymmen birge namaz oqımyn, sanaly bolýǵa umtylyp, úıdiń berekesin saqtaımyn. Osyndaı kúıeýdi bergen Allaǵa sansyz shúkir”, – delingen advokat oqyǵan qolhatta.
Aıtýlarynsha, osy kezde Saltanat qyzǵanyp, hat-habarlardy qaǵazǵa shyǵaryp ákelýdi suraǵan. Bıshimbaev sony usynǵannan soń ol osyndaı qolhat jazǵan. Osy bloknottaǵy hat arqyly advokattar “Qınaý” babyn joqqa shyǵarmaq boldy.
Alaıda sýdıa muny dálel retinde qoldaný jóninde aryzdy qabyldamady.
Eske salaıyq, burynǵy ulttyq ekonomıka mınıstri Qýandyq Bıshimbaev áıeli Saltanat Núkenovany óltirdi degen kúdikpen ustalǵan bolatyn. Keıinnen qylmysty jasyrdy degen aıyppen Saltanat Núkenova kóz jumǵan meıramhananyń dırektory da tutqyndaldy. Budan bólek eks-mınıstr Qýandyq Bıshimbaevqa Qylmystyq kodekstiń 110-baby 2-bóligi ("Azaptaý"), Qylmystyq kodekstiń 99-baby 2-bóligi 5-tarmaǵy ("Asa qatygezdikpen adam óltirý") boıynsha jańa aıyptar taǵylǵan edi. Al onyń týysy Baqytjan Baıjanov – qylmysty jasyrǵany jáne habarlamaǵany úshin aıyptalǵan edi.
