باتىس قازاقستان وبلىسىنىڭ اكىمى ناريمان تورەعاليەۆ ءوڭىر تۇرعىندارىنا سۋ تاسقىنىنا بايلانىستى ۇندەۋ جولدادى.
«قۇرمەتتى باتىس قازاقستاندىقتار! وڭىرىمىزدە سۋ تاسقىنىنىڭ سالدارىنان كۇردەلى جاعداي ورىن العانى بەلگىلى. وبلىسىمىزدىڭ سىرىم، تەرەكتى، قاراتوبە، ءبورلى اۋداندارىندا سۋ تاسقىنى بولىپ، تۇرعىن ۇيلەردى سۋ باستى. وسىنىڭ سالدارىنان 4 مىڭعا جۋىق ادام قاۋىپسىز جەرگە كوشىرىلدى، ونىڭ جارتىسى بالالار. تاسقىننان زارداپ شەككەندەرگە جەدەل ەۆاكۋاتسيالىق پۋنكتتەر ۇيىمداستىرىلىپ، قاجەتتى جاعداي جاسالۋدا.
قۇرمەتتى جەرلەستەر! سونداي-اق، كورشىلەس رەسەي ەلىنەن باستاۋ الاتىن 5 ترانسشەكارالىق وزەندەرىمىزدە سۋ دەڭگەيى كوتەرىلۋدە. سونىڭ سالدارىنان كازتالوۆ جانە جاڭاقالا اۋداندارىنا باراتىن قارا جانە سارى وزەندەردە سۋ دەڭگەيى ارتۋدا. قازىرگى ۋاقىتتا بۇل وڭىرلەردە قاۋىپسىزدىك شارالارى كۇشەيتىلدى.
مامانداردىڭ مالىمەتىنشە، سۋدىڭ دەڭگەيى وبلىستا وسىدان 30 جىل بۇرىن بولعان ەڭ جوعارى كورسەتكىشتەن اسىپ كەتتى. ورال قالاسىنداعى شاعان جانە دەركول وزەنى قاۋىپتى دەڭگەيگە جەتتى. سونداي-اق، جايىق وزەنىندە دە سۋ كولەمى ارتۋدا. سونىڭ سالدارىنان ورال قالاسى مەن بايتەرەك، تەرەكتى اۋداندارىن سۋ باسۋ قاۋپى سەيىلگەن جوق»، - دەدى وبلىسى اكىمى.
سونداي-اق ول ورال قالاسىنىڭ ماڭىنداعى پودستەپنوە اۋىلىندا دا سۋ تاسقىنى بولىپ، قازىرگى ۋاقىتتا سۋدى سورۋ، سۋ وتەتىن جىلعالاردى كەڭەيتۋ، توپىراقپەن قورشاۋ جۇمىستارى جۇرگىزىلىپ جاتقانىن اتاپ ءوتتى.
«قۇرمەتتى جەرلەستەر! بۇگىن مەملەكەت باسشىسىنا وبلىستاعى جاعدايدى باياندادىم. پرەزيدەنت ءوز تاراپىنان حالىققا بارىنشا كومەك كورسەتىلەتىنىن ايتتى. زارداپ شەككەندەردىڭ ارقايسىسى مەملەكەت تاراپىنان بەرىلەتىن كومەكتەن قالىس قالمايدى! قۇتقارۋشىلار، توتەنشە جاعداي ماماندارى، كوممۋنالدىق قىزمەتتەر، كۇشتىك قۇرىلىمدار، ۆولەنتەرلەر جانە تۇرعىندارىمىز كۇن دەمەي، ءتۇن دەمەي سۋ تاسقىنىمەن كۇرەسۋدە! مەن ءۇشىن جەرلەستەرىمنىڭ اماندىعى ءبىرىنشى ورىندا! سوندىقتان، تاسقىننىڭ الدىن الۋعا باعىتتالعان بارلىق قاجەتتى شارالار اتقارىلاتىن بولادى! وسىناۋ قيىن كەزەڭدە سابىرلىق ساقتاپ، ءبىر-بىرىمىزگە قولداۋ كورسەتەيىك! ءبىز بىرگەمىز!»، - دەدى وبلىس اكىمى.
