Batys Qazaqstan oblysynyń ákimi Narıman Tóreǵalıev óńir turǵyndaryna sý tasqynyna baılanysty úndeý joldady.
«Qurmetti Batys Qazaqstandyqtar! Óńirimizde sý tasqynynyń saldarynan kúrdeli jaǵdaı oryn alǵany belgili. Oblysymyzdyń Syrym, Terekti, Qaratóbe, Bórli aýdandarynda sý tasqyny bolyp, turǵyn úılerdi sý basty. Osynyń saldarynan 4 myńǵa jýyq adam qaýipsiz jerge kóshirildi, onyń jartysy balalar. Tasqynnan zardap shekkenderge jedel evakýaııalyq pýnktter uıymdastyrylyp, qajetti jaǵdaı jasalýda.
Qurmetti jerlester! Sondaı-aq, Kórshiles Reseı elinen bastaý alatyn 5 transshekaralyq ózenderimizde sý deńgeıi kóterilýde. Sonyń saldarynan Kaztalov jáne Jańaqala aýdandaryna baratyn Qara jáne Sary ózenderde sý deńgeıi artýda. Qazirgi ýaqytta bul óńirlerde qaýipsizdik sharalary kúsheıtildi.
Mamandardyń málimetinshe, sýdyń deńgeıi oblysta osydan 30 jyl buryn bolǵan eń joǵary kórsetkishten asyp ketti. Oral qalasyndaǵy Shaǵan jáne Derkól ózeni qaýipti deńgeıge jetti. Sondaı-aq, Jaıyq ózeninde de sý kólemi artýda. Sonyń saldarynan Oral qalasy men Báıterek, Terekti aýdandaryn sý basý qaýpi seıilgen joq», - dedi oblysy ákimi.
Sondaı-aq ol Oral qalasynyń mańyndaǵy Podstepnoe aýylynda da sý tasqyny bolyp, qazirgi ýaqytta sýdy sorý, sý ótetin jylǵalardy keńeıtý, topyraqpen qorshaý jumystary júrgizilip jatqanyn atap ótti.
«Qurmetti jerlester! Búgin Memleket basshysyna oblystaǵy jaǵdaıdy baıandadym. Prezıdent óz tarapynan halyqqa barynsha kómek kórsetiletinin aıtty. Zardap shekkenderdiń árqaısysy Memleket tarapynan beriletin kómekten qalys qalmaıdy! Qutqarýshylar, tótenshe jaǵdaı mamandary, kommýnaldyq qyzmetter, kúshtik qurylymdar, volenterler jáne turǵyndarymyz kún demeı, tún demeı sý tasqynymen kúresýde! Men úshin jerlesterimniń amandyǵy birinshi orynda! Sondyqtan, tasqynnyń aldyn alýǵa baǵyttalǵan barlyq qajetti sharalar atqarylatyn bolady! Osynaý qıyn kezeńde sabyrlyq saqtap, bir-birimizge qoldaý kórseteıik! Biz birgemiz!», - dedi oblys ákimi.
