قازنەتتە «بوزاشىترانسقۇرىلىس» جشس قىزمەتكەرلەرى قازاقستان پرەزيدەنتى قاسىم-جومارت توقاەۆقا، وبلىس اكىمى نۇرلان نوعاەۆقا جانە «قازمۇنايگاز» باسشىلىعىنا ارناپ ۇندەۋ جاريالاعان ۆيدەو تارادى.
ولار ءوز ۇندەۋىندە West Oil Software كومپانياسىنىڭ قىزمەتكەرلەرىن تولىق قولدايتىنىن ايتىپ، تالاپتارىنىڭ تولىق ورىندالۋىن تالاپ ەتەدى. سونىمەن قاتار، «بوزاشىترانسقۇرىلىس» كومپانياسىنىڭ قىزمەتكەرلەرى ەڭبەك داۋى كەزىندە جۇمىسشىلاردى قۋدالاۋدى توقتاتۋعا شاقىرادى.
وسىعان ۇقساس ۇندەۋدە مۇناي ءوندىرىسىن حيميالاندىرۋ قىزمەتكەرلەرى دە West Oil Software جۇمىسشىلارىنىڭ تالاپتارىن قولدايتىندىقتارىن جانە ولاردىڭ ىنتىماقتاستىعىن جاريالادى.
بۇعان دەيىن ماڭعىستاۋدا West Oil Software مۇناي سەرۆيستىك كومپانياسىنىڭ قىزمەتكەرلەرى ەرەۋىلگە شىققانىن جازعان ەدىك. ولار «قازمۇنايگازعا» قوسىلۋدى، سونداي-اق ولارعا بىرىڭعاي جالاقى جۇيەسىن قولدانۋدى، ماتەريالدىق-تەحنيكالىق بازاسىن جاڭارتۋدى تالاپ ەتەدى.
ايتا كەتسەك، جەلتوقساننىڭ 11-ءى كۇنى كەشكە ەرەۋىلشىلەر اۋا رايىنىڭ قولايسىزدىعىنا قاراماستان تارامايتىندارىن، نارازىلىقتارىن جالعاستىراتىندارىن مالىمدەدى. جۇمىسشىلاردىڭ ايتۋىنشا، وقيعا ورنىندا ارنايى پوليتسيا قىزمەتكەرلەرى كەزەكشىلىك ەتۋدە.
ينتەرنەتتە تاراعان ەرەۋىلشىلەردىڭ ۆيدەوسى بەلگىلى ءبىر ەر ادامنىڭ «شاتىر تىگۋگە بولمايدى دەيدى، شاتىر ورناتۋعا رۇقسات بەرمەيدى» دەگەن داۋىستار ەستىلدى.
كەيىن ەنەرگەتيكا ءمينيسترى الماسادام ساتقاليەۆ ەرەۋىل تۋرالى تۇسىنىكتەمە بەرىپ، قاجەت بولعان جاعدايدا ايماققا بارۋعا دايىن ەكەنىن، الايدا ازىرگە ماسەلە تاپسىرىس بەرۋشى مەن مەردىگەر اراسىنداعى قارىم-قاتىناس سالاسىندا ەكەنىن ايتتى.
«قازمۇنايگاز» كومپانياسىنىڭ توراعاسى ماعزۇم ميرزاعاليەۆ تە ەرەۋىلگە قاتىستى ءوز پىكىرىن ءبىلدىردى. ول كومپانيا ەرەۋىلگە شىققان جۇمىسشىلاردى جۇمىسقا الا المايتىنىن ايتتى.
سونىمەن بىرگە ول كومپانيا West Oil Software جابدىقتارىن جاڭارتاتىنا ۋادە بەردى.
